പട്ന: ബിഹാറിൽ കന്യാസ്ത്രീയെ ഒരുസംഘം വിദ്യാർത്ഥികൾ ചേർന്ന് പൊതുമധ്യത്തിൽ അപമാനിക്കുന്ന വീഡിയോ സമൂഹമാധ്യമങ്ങളിൽ വൻ പ്രതിഷേധത്തിന് കാരണമാകുന്നു. യൂണിഫോം ധരിച്ച വിദ്യാർത്ഥികൾ കന്യാസ്ത്രീയെ വളഞ്ഞുനിൽക്കുകയും ലൈംഗിക ചുവയുള്ള വാക്കുകളും അശ്ലീല പരാമർശങ്ങളും നടത്തി അധിക്ഷേപിക്കുന്നതുമാണ് ദൃശ്യങ്ങളിലുള്ളത്.(Obscene mockery of nun, protest against the cruel entertainment of students in Bihar)
സോഷ്യൽ മീഡിയയിൽ പ്രചരിക്കുന്ന വീഡിയോ പ്രകാരം, വിദ്യാർത്ഥികൾ കന്യാസ്ത്രീയെ തടഞ്ഞുനിർത്തി നടിമാരുടെയും പോൺ താരങ്ങളുടെയും പേര് വിളിച്ച് പരിഹസിക്കുകയായിരുന്നു. പേരുകൾ ഉച്ചത്തിൽ വിളിച്ചു പറയുന്നതും മോശം വാക്കുകൾ ഉപയോഗിക്കുന്നതും വീഡിയോയിൽ വ്യക്തമാണ്.
കുട്ടികളുടെ ഈ മോശം പെരുമാറ്റത്തിൽ കന്യാസ്ത്രീ അങ്ങേയറ്റം അസ്വസ്ഥയാകുന്നതും അവരെ അവഗണിച്ച് മുന്നോട്ട് പോകാൻ ശ്രമിക്കുന്നതും ദൃശ്യങ്ങളിലുണ്ട്. കുട്ടികൾക്ക് അടിസ്ഥാന മര്യാദകളും സഹാനുഭൂതിയും പഠിപ്പിച്ചു നൽകുന്നതിൽ സമൂഹം പരാജയപ്പെട്ടുവെന്ന് പലരും അഭിപ്രായപ്പെട്ടു.
