ന്യൂഡൽഹി: രാഷ്ട്രീയ ചർച്ചകളിൽ കോൺഗ്രസ് ഇരട്ടത്താപ്പ് കാണിക്കുന്നുവെന്നാരോപിച്ച് ബിജെപി എംപി നിഷികാന്ത് ദുബെ (Nishikant Dubey BJP MP). 1964-ൽ കോൺഗ്രസ് പാർലമെന്ററി പാർട്ടി നേതാവ് മുൻ പ്രധാനമന്ത്രി ജവഹർലാൽ നെഹ്റുവിനെ രാജ്യത്തിന് തുല്യമായി വിശേഷിപ്പിച്ച കാര്യം ഓർമ്മിപ്പിച്ചായിരുന്നു അദ്ദേഹത്തിന്റെ വിമർശനം. “നെഹ്റു എന്നാൽ ഇന്ത്യ, ഇന്ത്യ എന്നാൽ നെഹ്റു” എന്ന് പറയുന്നത് കോൺഗ്രസിന് പ്രശ്നമല്ലെന്നും എന്നാൽ പ്രധാനമന്ത്രി മോദി ചോദ്യങ്ങൾക്കും അതീതനാണെന്ന് പറയുന്നത് വിവാദമാക്കുകയാണെന്നും അദ്ദേഹം കുറ്റപ്പെടുത്തി.
ഇന്ത്യ-യുഎസ് ഇടക്കാല വ്യാപാര കരാറുമായി ബന്ധപ്പെട്ട് പ്രതിപക്ഷ നേതാവ് രാഹുൽ ഗാന്ധിയും നിഷികാന്ത് ദുബെയും തമ്മിലുള്ള തർക്കം നിലവിൽ രൂക്ഷമാണ്. പുതിയ വ്യാപാര കരാർ ഇന്ത്യയിലെ കോട്ടൺ കർഷകരെയും ടെക്സ്റ്റൈൽ മേഖലയെയും ദോഷകരമായി ബാധിക്കുമെന്ന രാഹുൽ ഗാന്ധിയുടെ ആരോപണമാണ് തർക്കങ്ങൾക്ക് തുടക്കമിട്ടത്. രാഹുലിന്റെ അവകാശവാദങ്ങൾ തെറ്റാണെന്നും ഏത് വേദിയിലും ഇതേക്കുറിച്ച് സംവാദത്തിന് താൻ തയ്യാറാണെന്നും ദുബെ വെല്ലുവിളിച്ചു.
അമേരിക്കയിലേക്ക് ഗാർമെന്റ്സ് കയറ്റുമതി ചെയ്യുന്നതിൽ ബംഗ്ലാദേശിന് സീറോ ടാരിഫ് ആനുകൂല്യം ലഭിക്കുന്നുണ്ടെന്നും എന്നാൽ ഇന്ത്യൻ ഉൽപ്പന്നങ്ങൾക്ക് 18 ശതമാനം നികുതിയുണ്ടെന്നും രാഹുൽ ഗാന്ധി ചൂണ്ടിക്കാട്ടിയിരുന്നു. അമേരിക്കൻ പരുത്തി ഇറക്കുമതി ചെയ്യണമെന്ന നിബന്ധനയോടെയാണ് ബംഗ്ലാദേശിന് ഈ ആനുകൂല്യം ലഭിക്കുന്നത്. ഇത് ഇന്ത്യയിലെ ആഭ്യന്തര കർഷകർക്ക് തിരിച്ചടിയാകുമെന്ന് രാഹുൽ ആരോപിച്ചു. എന്നാൽ കർഷകരുടെ താൽപ്പര്യങ്ങൾ സംരക്ഷിച്ചുകൊണ്ടാണ് കേന്ദ്ര സർക്കാർ നീങ്ങുന്നതെന്നും കയറ്റുമതി വർദ്ധിപ്പിക്കാനാണ് ശ്രമിക്കുന്നതെന്നും നിഷികാന്ത് ദുബെ മറുപടി നൽകി.
Summary: BJP MP Nishikant Dubey accused the Congress of double standards, citing their 1964 slogan “Nehru means India” while they now criticize praise for PM Modi.
