ന്യൂഡൽഹി: കിഴക്കൻ ഡൽഹിയിലെ ഗീത കോളനിയിൽ പതിനാറുകാരിയായ പെൺകുട്ടി ദുരൂഹസാഹചര്യത്തിൽ മരിച്ചു. കഴിഞ്ഞ വർഷം ഒക്ടോബറിൽ ആസിഡ് ഉള്ളിൽ ചെന്നതിനെത്തുടർന്ന് ചികിത്സയിലായിരുന്ന പെൺകുട്ടി ശനിയാഴ്ചയാണ് (2026 ഫെബ്രുവരി 7) ലോക് നായക് ആശുപത്രിയിൽ വെച്ച് മരണമടഞ്ഞത് (Delhi minor girl acid ingestion). പെൺകുട്ടിയെ ഭർത്താവ് ലൈംഗികമായി പീഡിപ്പിക്കുകയും നിർബന്ധിച്ച് ആസിഡ് കുടിപ്പിക്കുകയും ചെയ്തുവെന്ന് മാതാവ് പരാതി നൽകിയതോടെ പോലീസ് കേസെടുത്ത് അന്വേഷണം ആരംഭിച്ചു.
2025 ജൂലൈയിലാണ് പെൺകുട്ടിയും ഉത്തർപ്രദേശ് സ്വദേശിയായ യുവാവും തമ്മിലുള്ള വിവാഹം നടന്നത്. ഒക്ടോബറിൽ ആസിഡ് ഉള്ളിൽ ചെന്ന നിലയിൽ ആശുപത്രിയിൽ പ്രവേശിപ്പിച്ചപ്പോൾ, ഭർത്താവുമായുള്ള വഴക്കിനെത്തുടർന്ന് സ്വയം കുടിച്ചതാണെന്നാണ് പെൺകുട്ടിയും മാതാവും ആദ്യം മൊഴി നൽകിയിരുന്നത്. എന്നാൽ പിന്നീട് മാതാവ് മൊഴി മാറ്റുകയും ഭർത്താവ് പീഡിപ്പിച്ചുവെന്ന് ആരോപിക്കുകയും ചെയ്തു. പെൺകുട്ടിയുടെ മരണകാരണം വ്യക്തമാകാൻ പോസ്റ്റ്മോർട്ടം റിപ്പോർട്ടിനായി പോലീസ് കാത്തിരിക്കുകയാണ്. പോക്സോ (POCSO) നിയമപ്രകാരവും ബലാത്സംഗക്കുറ്റത്തിനുമാണ് ഇപ്പോൾ കേസ് രജിസ്റ്റർ ചെയ്തിരിക്കുന്നത്.
Summary: A 16-year-old girl from Delhi’s Geeta Colony died months after suspected acid ingestion. While initial reports suggested self-consumption, her mother later alleged sexual assault and forced ingestion by her husband, leading to a POCSO and rape investigation by the Delhi Police.
