ന്യൂഡൽഹി: ഉന്നാവോ ബലാത്സംഗക്കേസിലെ അതിജീവിതയുടെ പിതാവ് പോലീസ് കസ്റ്റഡിയിൽ മരിച്ച സംഭവത്തിൽ, ശിക്ഷിക്കപ്പെട്ട മുൻ ബിജെപി എംഎൽഎ കുൽദീപ് സിംഗ് സെൻഗാർ നൽകിയ ജാമ്യാപേക്ഷ സുപ്രീം കോടതി ഇന്ന് പരിഗണിക്കും. ചീഫ് ജസ്റ്റിസ് അധ്യക്ഷനായ ബെഞ്ചാണ് ഹർജിയിൽ വാദം കേൾക്കുന്നത്.(Unnao rape case, Supreme Court to hear Kuldeep Singh Sengar’s bail plea today in custodial death of survivor’s father)
ഡൽഹി ഹൈക്കോടതി ജാമ്യം നിഷേധിച്ചതിനെ തുടർന്നാണ് സെൻഗാർ സുപ്രീം കോടതിയെ സമീപിച്ചത്. ഈ കേസിൽ 10 വർഷം കഠിനതടവാണ് കോടതി വിധിച്ചിരിക്കുന്നത്. കഴിഞ്ഞ ജനുവരി 19-ന് സെൻഗാറിൻ്റെ തടവ് ശിക്ഷ മരവിപ്പിക്കാൻ ഡൽഹി ഹൈക്കോടതി വിസമ്മതിച്ചിരുന്നു. ഇതാണ് സുപ്രീം കോടതിയിൽ അപ്പീൽ നൽകാൻ കാരണമായത്.
പിതാവിൻ്റെ മരണവുമായി ബന്ധപ്പെട്ട കേസിന് പുറമെ, പെൺകുട്ടിയെ ബലാത്സംഗം ചെയ്ത കേസിൽ സെൻഗാർ ജീവപര്യന്തം തടവ് ശിക്ഷയും അനുഭവിക്കുന്നുണ്ട്. ബലാത്സംഗ കേസിലെ ശിക്ഷ മരവിപ്പിച്ച് 2025 ഡിസംബർ 23-ന് ഹൈക്കോടതി സെൻഗാറിന് ജാമ്യം അനുവദിച്ചിരുന്നു. എന്നാൽ, ഇതിനെതിരെ സുപ്രീം കോടതി രംഗത്തെത്തുകയും ഡിസംബർ 29-ന് ഹൈക്കോടതി ഉത്തരവ് സ്റ്റേ ചെയ്യുകയുമായിരുന്നു.
