കൊൽക്കത്ത: പശ്ചിമ ബംഗാൾ നിയമസഭാ തിരഞ്ഞെടുപ്പിനുള്ള ബിജെപിയുടെ പ്രകടനപത്രിക കേന്ദ്ര ആഭ്യന്തര മന്ത്രി അമിത് ഷാ പുറത്തിറക്കി. സ്ത്രീ ശാക്തീകരണം, അഴിമതി വിരുദ്ധ പോരാട്ടം, നുഴഞ്ഞുകയറ്റം തടയൽ എന്നിവയ്ക്ക് മുൻഗണന നൽകുന്ന വാഗ്ദാനങ്ങളാണ് പത്രികയിലുള്ളത്.(Amit Shah releases BJP manifesto for West Bengal; promises ₹3000 for women)
ബിജെപി അധികാരത്തിൽ വന്നാൽ സംസ്ഥാനത്തെ സ്ത്രീകൾക്ക് പ്രതിമാസം 3000 രൂപ വീതം ധനസഹായം നൽകും. തൃണമൂൽ സർക്കാരിന്റെ ‘ലക്ഷ്മി ഭണ്ഡാർ’ പദ്ധതിക്ക് ബദലായാണ് ഈ പ്രഖ്യാപനം. സർക്കാർ രൂപീകരിച്ച് ആറ് മാസത്തിനുള്ളിൽ സംസ്ഥാനത്ത് ഏകീകൃത സിവിൽ കോഡ് നടപ്പിലാക്കും.
സർക്കാർ ജീവനക്കാരുടെ ദീർഘകാല ആവശ്യമായ ഏഴാം ശമ്പള കമ്മീഷൻ നടപ്പിലാക്കും. അതിർത്തി കടന്നുള്ള നുഴഞ്ഞുകയറ്റവും പശുക്കടത്തും പൂർണ്ണമായും നിരോധിക്കും. ഇതിനായി കർശനമായ നിരീക്ഷണം ഏർപ്പെടുത്തും. തൃണമൂൽ കോൺഗ്രസ് ഭരണകാലത്തെ അഴിമതികൾ അന്വേഷിക്കാൻ പ്രത്യേക അന്വേഷണ സംഘത്തെ നിയമിക്കും. ബംഗാളിലെ സ്ത്രീ വോട്ടർമാരെ ലക്ഷ്യം വെച്ചുള്ളതാണ് പ്രതിമാസ ധനസഹായ പദ്ധതിയെന്നാണ് വിലയിരുത്തപ്പെടുന്നത്. കേന്ദ്രമന്ത്രിമാരും മുതിർന്ന ബിജെപി നേതാക്കളും പങ്കെടുത്ത ചടങ്ങിൽ “ബംഗാളിന്റെ സുവർണ്ണ കാലം തിരികെ കൊണ്ടുവരും” എന്ന് അമിത് ഷാ പ്രഖ്യാപിച്ചു.
