ഹവാന: അയൽരാജ്യമായ ക്യൂബയ്ക്കെതിരെ രൂക്ഷമായ ഭാഷയിൽ ഭീഷണി മുഴക്കി അമേരിക്കൻ പ്രസിഡന്റ് ഡൊണാൾഡ് ട്രംപ് (Trump Threatens Cuba Takeover). ക്യൂബയുടെ കാര്യത്തിൽ തനിക്ക് എന്ത് വേണമെങ്കിലും ചെയ്യാമെന്നും, ഏതെങ്കിലും രൂപത്തിൽ ക്യൂബയെ ‘കൈക്കലാക്കാൻ’ സാധിക്കുന്നത് വലിയ ബഹുമതിയായി കാണുന്നുവെന്നും ട്രംപ് പറഞ്ഞു. ക്യൂബയും അമേരിക്കയും തമ്മിൽ ബന്ധം മെച്ചപ്പെടുത്താനുള്ള ചർച്ചകൾ നടക്കുന്നതിനിടെയാണ് ട്രംപിന്റെ ഈ വിവാദ പരാമർശം.
ക്യൂബൻ പ്രസിഡന്റ് മിഗുവൽ ഡിയാസ് കനാലിനെ അധികാരത്തിൽ നിന്ന് മാറ്റുക എന്നത് അമേരിക്കയുടെ പ്രധാന ലക്ഷ്യമാണെന്ന് ന്യൂയോർക്ക് ടൈംസ് റിപ്പോർട്ട് ചെയ്തു. ചർച്ചകളിൽ ഇക്കാര്യം അമേരിക്കൻ പ്രതിനിധികൾ ക്യൂബയെ അറിയിച്ചതായും സൂചനയുണ്ട്. എന്നാൽ രാജ്യത്തിന്റെ ആഭ്യന്തര കാര്യങ്ങളിൽ വിദേശ ഇടപെടൽ അനുവദിക്കില്ലെന്ന കർശന നിലപാടിലാണ് ക്യൂബ. വെനസ്വേലൻ പ്രസിഡന്റ് നിക്കോളാസ് മഡുറോയെ പുറത്താക്കിയതിനും ഇസ്രായേലിനൊപ്പം ചേർന്ന് ഇറാനെ ആക്രമിച്ചതിനും പിന്നാലെ ക്യൂബയാണ് തന്റെ അടുത്ത ലക്ഷ്യമെന്ന് ട്രംപ് പലതവണ സൂചിപ്പിച്ചിരുന്നു.
പ്രതിസന്ധിയിലായി ക്യൂബൻ സമ്പദ്വ്യവസ്ഥ
അമേരിക്ക ഏർപ്പെടുത്തിയ എണ്ണ ഉപരോധത്തെത്തുടർന്ന് ക്യൂബ കടുത്ത ഊർജ്ജ പ്രതിസന്ധിയിലാണ്. കഴിഞ്ഞ മൂന്ന് മാസമായി രാജ്യത്തേക്ക് എണ്ണക്കപ്പലുകൾ എത്തിയിട്ടില്ല. തിങ്കളാഴ്ച ക്യൂബയിലെ വൈദ്യുതി ശൃംഖല പൂർണ്ണമായും തകരാറിലായതോടെ ഒരു കോടിയോളം ജനങ്ങൾ ഇരുട്ടിലായി. സമ്പദ്വ്യവസ്ഥ ഏതാണ്ട് സ്തംഭിച്ച അവസ്ഥയിലാണ്. വെനസ്വേലയിൽ നിന്നുള്ള എണ്ണ വിതരണം അമേരിക്ക തടഞ്ഞതും ക്യൂബയ്ക്ക് എണ്ണ വിൽക്കുന്ന രാജ്യങ്ങൾക്ക് മേൽ നികുതി ഏർപ്പെടുത്തുമെന്ന ട്രംപിന്റെ ഭീഷണിയുമാണ് ഈ തകർച്ചയ്ക്ക് കാരണം.
1962-ലെ മിസൈൽ പ്രതിസന്ധിക്ക് ശേഷം ക്യൂബയെ ആക്രമിക്കില്ലെന്ന സോവിയറ്റ് യൂണിയനുമായുള്ള കരാർ നിലനിൽക്കെയാണ് ട്രംപ് ഇത്തരമൊരു സൈനിക നീക്കത്തിന് സൂചന നൽകുന്നത്. “ഞങ്ങൾ ക്യൂബയുമായി സംസാരിക്കുന്നുണ്ട്, പക്ഷേ ക്യൂബയ്ക്ക് മുൻപ് ഇറാന്റെ കാര്യത്തിൽ ഒരു തീരുമാനമുണ്ടാകും,” എന്നും ട്രംപ് പറഞ്ഞു.
Summary
U.S. President Donald Trump has escalated tensions with Cuba, stating he has the authority to do “anything I want” with the neighboring island and expressing a desire to “take Cuba in some form.” These threats come as Cuba’s electrical grid has completely collapsed due to a U.S.-imposed oil blockade.
