വാഷിംഗ്ടൺ: പശ്ചിമേഷ്യൻ യുദ്ധം അവസാനിപ്പിക്കുന്നതിനായി അമേരിക്ക മുന്നോട്ട് വെയ്ക്കുന്ന ഏത് സമാധാന കരാറും ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവിന് അംഗീകരിക്കുകയല്ലാതെ മറ്റ് മാർഗ്ഗമില്ലെന്ന് കടുത്ത ഭാഷയിൽ മുന്നറിയിപ്പ് നൽകി യുഎസ് പ്രസിഡന്റ് ഡൊണാൾഡ് ട്രംപ് (Trump Iran Peace Deal Negotiations). മിഡിൽ ഈസ്റ്റിൽ ഇസ്രായേൽ നടത്തുന്ന സൈനിക പ്രകോപനങ്ങൾ എത്രയും വേഗം അവസാനിപ്പിക്കണമെന്നും ട്രംപ് ആവശ്യപ്പെട്ടു. പ്രമുഖ അന്താരാഷ്ട്ര മാധ്യമമായ ‘ദി ഫിനാൻഷ്യൽ ടൈംസിന്’ നൽകിയ പ്രത്യേക ഫോൺ അഭിമുഖത്തിലാണ് ട്രംപ് തന്റെ കർശന നിലപാട് വ്യക്തമാക്കിയത്. തങ്ങൾ രൂപീകരിക്കുന്ന സമാധാന ഉടമ്പടി അംഗീകരിക്കാൻ നെതന്യാഹുവിന് മേൽ കടുത്ത സമ്മർദ്ദമുണ്ടെന്ന് വ്യക്തമാക്കിയ ട്രംപ്, ഈ മേഖലയിലെ സൈനികവും രാഷ്ട്രീയവുമായ അന്തിമ തീരുമാനങ്ങൾ എടുക്കുന്നത് താനാണെന്നും നെതന്യാഹുവല്ലെന്നും ആവർത്തിച്ചു.
ഏപ്രിൽ ആദ്യം നിലവിൽ വന്ന താൽക്കാലിക വെടിനിർത്തൽ ലംഘിച്ചുകൊണ്ട് കഴിഞ്ഞ ദിവസം ഇസ്രായേലിന് നേരെ ഇറാൻ ബാലിസ്റ്റിക് മിസൈൽ ആക്രമണം നടത്തിയിരുന്നു. എന്നാൽ ഈ ആക്രമണമൊന്നും ഇറാനുമായി യുഎസ് നടത്തുന്ന സമാധാന ചർച്ചകളെ ബാധിക്കില്ലെന്ന് ട്രംപ് വ്യക്തമാക്കി. ഇറാനെതിരെ ഇസ്രായേൽ തിരിച്ചടിക്ക് മുതിരരുതെന്നും ചർച്ചകളുടെ മേശപ്പുറത്തേക്ക് മടങ്ങിവരണമെന്നും ട്രംപ് ആവശ്യപ്പെട്ടിട്ടുണ്ട്. ഇറാനുമായി വളരെ നല്ലൊരു കരാറിലേക്ക് അമേരിക്ക അടുക്കുകയാണെന്നും അതിനാൽ ഇസ്രായേൽ വ്യോമാക്രമണങ്ങളിൽ നിന്നും തൽക്കാലം പിന്മാറണമെന്നും ട്രംപ് ഫോണിലൂടെ നെതന്യാഹുവിനോട് ആവശ്യപ്പെട്ടതായി വൈറ്റ് ഹൗസ് വൃത്തങ്ങൾ സൂചിപ്പിച്ചു.
നെതന്യാഹു ഇതിനോട് പൂർണ്ണമായി യോജിച്ചില്ലെങ്കിലും തൽക്കാലം ആക്രമണങ്ങളിൽ നിന്നും പിന്മാറാൻ സമ്മതിച്ചിട്ടുണ്ട്.
എന്നാൽ സമാധാന കരാർ പരാജയപ്പെടുകയാണെങ്കിൽ ഇറാന്റെ സൈനിക താവളങ്ങൾക്ക് നേരെ കമാൻഡോ ആക്രമണം നടത്തുന്നതിനെക്കുറിച്ചോ അല്ലെങ്കിൽ ഇറാന്റെ തുറമുഖങ്ങൾക്ക് മേലുള്ള ഉപരോധം കൂടുതൽ കർശനമാക്കുന്നതിനെക്കുറിച്ചോ ആലോചിക്കുമെന്നും ട്രംപ് കൂട്ടിച്ചേർത്തു. കഴിഞ്ഞ ആഴ്ച നെതന്യാഹുവുമായി നടത്തിയ മറ്റൊരു രൂക്ഷമായ ഫോൺ സംഭാഷണത്തിൽ, അമേരിക്കയുടെ സഹായമില്ലായിരുന്നെങ്കിൽ നെതന്യാഹു ഇപ്പോൾ ജയിലിൽ ആകുമായിരുന്നുവെന്നും ഇപ്പോഴത്തെ കടുത്ത ആക്രമണങ്ങൾ കാരണം ലോകം മുഴുവൻ ഇസ്രായേലിനെ വെറുക്കുകയാണെന്നും ട്രംപ് തുറന്നടിച്ചിരുന്നു.
Summary: US President Donald Trump has issued a stark warning to Israeli Prime Minister Benjamin Netanyahu, stating he has “no choice” but to accept an upcoming US-led peace deal with Iran. In a phone interview with The Financial Times, Trump asserted his ultimate authority over Middle East strategic decisions, declaring, “I call all the shots.” Despite Iran’s recent ballistic missile strikes on Israel, Trump emphasized that the incident would not derail ongoing Washington-Tehran negotiations.
