ബാങ്കോക്ക്: തന്നെ വഞ്ചിച്ച ഭർത്താവിനെ വിവാഹമോചനം ചെയ്യുന്നതിന് പകരം കാമുകിക്ക് ‘വാടകയ്ക്ക്’ നൽകാൻ തയ്യാറായി ഒരു യുവതി (Thai Woman Lease Cheating Husband Mistress). തായ്ലൻഡിൽ നിന്നുള്ള ഈ വിചിത്രമായ വാർത്ത സോഷ്യൽ മീഡിയയിൽ വലിയ ചർച്ചകൾക്ക് വഴിമാറിയിരിക്കുകയാണ്. പ്രതിമാസം 30,000 ഭട്ട് (ഏകദേശം 85,000 രൂപ) നൽകുകയാണെങ്കിൽ ഭർത്താവിനെ കാമുകിക്കൊപ്പം താമസിക്കാൻ അനുവദിക്കാമെന്നാണ് യുവതിയുടെ വാഗ്ദാനം.
ഖുൻ ക്വാങ് എന്ന 31-കാരിയാണ് തന്റെ 35 വയസ്സുള്ള ഭർത്താവിനെതിരെ രംഗത്തെത്തിയത്. പോലീസ് ഓഫീസറായ ഭർത്താവിന് മറ്റൊരു സ്ത്രീയുമായി ദീർഘകാലമായി ബന്ധമുണ്ടെന്ന് ക്വാങ് കണ്ടെത്തി. 21-ാം വയസ്സിൽ വിവാഹിതരായ ഇവർക്ക് എട്ട് വയസ്സുള്ള ഒരു കുട്ടിയുണ്ട്. 2025 പകുതിയോടെയാണ് ഭർത്താവിന്റെ സ്വഭാവത്തിൽ മാറ്റങ്ങൾ കണ്ടുതുടങ്ങിയത്. അന്വേഷണത്തിനായി ഒരു പ്രൈവറ്റ് ഡിറ്റക്ടീവിനെ നിയോഗിച്ചതോടെയാണ് ഭർത്താവ് മറ്റൊരു യുവതിക്കൊപ്പം താമസിക്കുകയാണെന്ന വിവരം ക്വാങ് അറിഞ്ഞത്.
ഭർത്താവുമായി പിരിയാൻ തയ്യാറല്ലാത്ത ക്വാങ്, ഒരു ടിവി ഷോയിലൂടെയാണ് തന്റെ വിചിത്രമായ ആവശ്യം മുന്നോട്ടുവെച്ചത്. കാമുകിക്ക് ഭർത്താവിനെ വേണമെന്നുണ്ടെങ്കിൽ മാസം തോറും നിശ്ചിത തുക വാടകയായി നൽകണം. പണം ഒരു പ്രശ്നമല്ലെന്നും കരാറിന് സമ്മതമാണെന്നും കാമുകി അറിയിച്ചെങ്കിലും ഭർത്താവ് ഈ നിർദ്ദേശം നിരസിച്ചു. കാമുകിയെ പിരിയാൻ തനിക്ക് കഴിയില്ലെന്നും എന്നാൽ വാടകയ്ക്ക് നിൽക്കാൻ തയ്യാറല്ലെന്നുമാണ് അദ്ദേഹത്തിന്റെ നിലപാട്.
ഭർത്താവിനെ വാടകയ്ക്ക് നൽകുന്ന ഇത്തരം കരാറുകൾക്ക് തായ്ലൻഡിൽ നിയമസാധുതയില്ലെന്ന് നിയമവിദഗ്ധർ ചൂണ്ടിക്കാട്ടുന്നു. രാജ്യത്തെ ഏകഭാര്യ-ഭർത്തൃ നിയമങ്ങൾക്കും പൊതുമര്യാദയ്ക്കും വിരുദ്ധമാണ് ഇത്തരം ഇടപാടുകൾ. നിലവിൽ കാമുകിക്കെതിരെ ക്വാങ് കോടതിയിൽ കേസ് ഫയൽ ചെയ്തിട്ടുണ്ട്.
