ജിദ്ദ: ഹജ്ജ് ചട്ടങ്ങൾ ലംഘിച്ച് അനുമതിപത്രമില്ലാതെ മക്കയിലേക്ക് പ്രവേശിക്കാൻ ശ്രമിച്ച നാലുപേരെ സുരക്ഷാ സേന പിടികൂടി (Saudi Hajj Permit Rules 2026). ഹജ്ജ് സെക്യൂരിറ്റി ഫോഴ്സ് മക്കയിലേക്കുള്ള പ്രവേശന കവാടങ്ങളിൽ നടത്തിയ കർശന പരിശോധനയിലാണ് ഇവർ പിടിയിലായത്.
രണ്ട് യമൻ സ്വദേശികൾ, ഒരു ഈജിപ്ഷ്യൻ പൗരൻ, ഒരു സൗദി പൗരൻ എന്നിവരാണ് പിടിയിലായത്. ഇവർക്കെതിരെ നിയമനടപടികൾ ആരംഭിച്ചതായി അധികൃതർ അറിയിച്ചു.
ഹജ്ജ് സീസൺ പ്രമാണിച്ച് മക്കയിലേക്കുള്ള എല്ലാ വഴികളിലും പരിശോധന ശക്തമാക്കിയിട്ടുണ്ട്. ‘പെർമിറ്റില്ലാതെ ഹജ്ജില്ല’ എന്ന നിബന്ധന കർശനമായി നടപ്പിലാക്കുകയാണ് ലക്ഷ്യം. അനുമതിയില്ലാതെ ഹജ്ജിനെത്തുന്നവർക്ക് വൻ തുക പിഴ ചുമത്തുകയും വിദേശികളാണെങ്കിൽ നാടുകടത്തൽ ഉൾപ്പെടെയുള്ള കടുത്ത ശിക്ഷാനടപടികൾ സ്വീകരിക്കുകയും ചെയ്യും.
നിയമലംഘനങ്ങൾ ശ്രദ്ധയിൽപ്പെട്ടാൽ മക്ക, മദീന, റിയാദ് എന്നിവിടങ്ങളിൽ 911 എന്ന നമ്പറിലും സൗദിയുടെ മറ്റ് ഭാഗങ്ങളിൽ 999 എന്ന നമ്പറിലും വിവരം അറിയിക്കാം. തീർഥാടനവുമായി ബന്ധപ്പെട്ട സർക്കാർ നിർദ്ദേശങ്ങൾ എല്ലാവരും കൃത്യമായി പാലിക്കണമെന്ന് പൊതുസുരക്ഷാ വിഭാഗം ആവർത്തിച്ചു വ്യക്തമാക്കി.
News Summary: The Saudi Hajj Security Forces have apprehended four individuals—two Yemenis, one Egyptian, and one Saudi national—for attempting to enter Makkah without a valid Hajj permit. The arrests were made at security checkpoints as part of the intensified “No Permit, No Hajj” campaign. Authorities confirmed that legal actions have been initiated against the violators. Public security officials urged all residents and visitors to strictly follow Hajj regulations, warning that unauthorized participation would lead to heavy fines and deportation for expatriates.
