മനില: തെക്കൻ ഫിലിപ്പീൻസിൽ റിക്ടർ സ്കെയിലിൽ 7.8 തീവ്രത രേഖപ്പെടുത്തിയ ശക്തമായ ഭൂചലനത്തെ തുടർന്ന് തീരപ്രദേശങ്ങളിൽ സുനാമി ആഞ്ഞടിച്ചു. ദുരന്തത്തിൽ നാല് പേർ മരണപ്പെടുകയും ഇരുന്നൂറിലധികം ആളുകൾക്ക് പരിക്കേൽക്കുകയും ചെയ്തതായാണ് ഔദ്യോഗിക റിപ്പോർട്ടുകൾ (Philippines Magnitude 7.8 Earthquake). തിങ്കളാഴ്ച (08.06.2026) പ്രാദേശിക സമയം രാവിലെ 7.37-ഓടെയാണ് ഫിലിപ്പീൻസിലെ മിന്ദനാവോ ദ്വീപിനെ വിറപ്പിച്ച ഭൂചലനമുണ്ടായത്. കോട്ടബറ്റോ ട്രെഞ്ചിലുണ്ടായ ചലനങ്ങളാണ് ഭൂകമ്പത്തിന് കാരണമായത്. സമുദ്രത്തിനടിയിൽ ഏകദേശം പത്ത് കിലോമീറ്റർ ആഴത്തിൽ രൂപപ്പെട്ട ചലനങ്ങളുടെ പ്രഭവകേന്ദ്രം പ്രമുഖ വാണിജ്യ നഗരമായ ജനറൽ സാന്റോസിന് 13 കിലോമീറ്റർ തെക്ക് പടിഞ്ഞാറാണെന്ന് ഫിലിപ്പീൻസ് ഇൻസ്റ്റിറ്റ്യൂട്ട് ഓഫ് വോൾക്കനോളജി ആൻഡ് സീസ്മോളജി വ്യക്തമാക്കുന്നു.
ഭൂചലനത്തിന് പിന്നാലെ സരങ്കാനി, സുൽത്താൻ കുദാരത് പ്രവിശ്യകളുടെ തീരങ്ങളിൽ ഒരു മീറ്ററോളം (3 അടി) ഉയരത്തിൽ സുനാമി തിരമാലകൾ അടിച്ചുകയറി. തീരപ്രദേശങ്ങളിൽ താമസിക്കുന്നവർ ഉടനടി ഉയർന്ന പ്രദേശങ്ങളിലേക്ക് മാറിത്താമസിക്കണമെന്ന് ഫിലിപ്പീൻസ് പ്രസിഡന്റ് ഫെർഡിനാൻഡ് മാർക്കോസ് ജൂനിയർ അടിയന്തര നിർദ്ദേശം നൽകി. ദുരന്തത്തിൽ ജനറൽ സാന്റോസ് നഗരത്തിൽ മാത്രം മൂന്ന് പേർ മരണപ്പെടുകയും നൂറിലധികം ആളുകൾക്ക് പരിക്കേൽക്കുകയും ചെയ്തു. ഇവിടെ നിരവധി കെട്ടിടങ്ങൾ ഭാഗികമായി തകരുകയും പ്രധാനപ്പെട്ട ഒരു പാലത്തിന് ഗുരുതരമായ വിള്ളലുകൾ വീഴുകയും ചെയ്തിട്ടുണ്ട്. ഭൂകമ്പത്തെത്തുടർന്ന് ജനറൽ സാന്റോസ് അന്താരാഷ്ട്ര വിമാനത്താവളം താൽക്കാലികമായി അടയ്ക്കുകയും 17 ആഭ്യന്തര സർവീസുകൾ റദ്ദാക്കുകയും ചെയ്തു.
ഭൂചലനത്തിന്റെ ആഘാതത്തിൽ ഭയന്നോടിയ സ്കൂൾ വിദ്യാർത്ഥികളിൽ പലരും പരിഭ്രാന്തരായി ബോധരഹിതരാകുകയും പലർക്കും പരിക്കേൽക്കുകയും ചെയ്തിട്ടുണ്ട്. അയൽരാജ്യങ്ങളായ ഇന്തോനേഷ്യ, മലേഷ്യ എന്നിവിടങ്ങളിലും ശക്തമായ പ്രകമ്പനം അനുഭവപ്പെടുകയും ഇവിടങ്ങളിൽ സുനാമി ജാഗ്രതാ നിർദ്ദേശം പുറപ്പെടുവിക്കുകയും ചെയ്തിട്ടുണ്ട്. ഇന്തോനേഷ്യയിലെ സുലവേസി ദ്വീപിന് സമീപം 83 സെന്റീമീറ്റർ ഉയരത്തിൽ തിരമാലകൾ രേഖപ്പെടുത്തി. ശാന്തസമുദ്രത്തിലെ “റിംഗ് ഓഫ് ഫയർ” മേഖലയിൽ സ്ഥിതി ചെയ്യുന്നതിനാൽ ഫിലിപ്പീൻസിൽ ഭൂകമ്പങ്ങളും അഗ്നിപർവ്വത സ്ഫോടനങ്ങളും പതിവാണ്.
Summary: A powerful magnitude 7.8 offshore earthquake struck the southern region of Mindanao in the Philippines on Monday morning, triggering a 1-meter tsunami and leaving at least four people dead and over 200 injured. The earthquake, centered 13 kilometers southwest of General Santos City at a depth of 10 kilometers, caused partial building collapses, shattered windows, and severely cracked a key access bridge.
