Follow on Google News
കമ്പാല: പതിറ്റാണ്ടുകളായി സൗഹൃദത്തിൽ കഴിഞ്ഞിരുന്ന ചിമ്പാൻസി കൂട്ടം രണ്ടായി പിരിയുകയും തുടർന്ന് പരസ്പരം കൊന്നൊടുക്കുകയും ചെയ്ത അപൂർവ്വ പ്രതിഭാസത്തിന് സാക്ഷ്യം വഹിച്ച് ശാസ്ത്രജ്ഞർ. ഉഗാണ്ടയിലെ കിബാലെ നാഷണൽ പാർക്കിലെ ‘എൻഗോഗോ’ ചിമ്പാൻസി കൂട്ടത്തിലാണ് ഈ ചോരക്കളി നടന്നത് (Ngogo Chimpanzee War Uganda). 2018 മുതൽ ഇതുവരെ ഒരു സംഘം മറ്റൊരു സംഘത്തിലെ 28 അംഗങ്ങളെയാണ് ആസൂത്രിതമായി വേട്ടയാടി കൊലപ്പെടുത്തിയത്.
1995 മുതൽ ഗവേഷകർ നിരീക്ഷിച്ചു വരുന്ന എൻഗോഗോ ഗ്രൂപ്പ് ലോകത്തിലെ ഏറ്റവും വലിയ ചിമ്പാൻസി സമൂഹമായിരുന്നു. ഏകദേശം 200 അംഗങ്ങളുണ്ടായിരുന്ന ഈ കൂട്ടം 2015-ഓടെയാണ് ഭിന്നിച്ചു തുടങ്ങിയത്. വർഷങ്ങളോളം ഒന്നിച്ച് നടക്കുകയും ഭക്ഷണം പങ്കിടുകയും ചെയ്തിരുന്നവർ പെട്ടെന്ന് ശത്രുക്കളായി മാറുകയായിരുന്നു. 2017-ൽ ഈ കൂട്ടം ‘വെസ്റ്റേൺ’, ‘സെൻട്രൽ’ എന്നിങ്ങനെ രണ്ട് വിഭാഗങ്ങളായി പൂർണ്ണമായും പിരിഞ്ഞു. ഇതിൽ വെസ്റ്റേൺ ഗ്രൂപ്പ് സെൻട്രൽ ഗ്രൂപ്പിനെതിരെ നിരന്തരം ആക്രമണങ്ങൾ അഴിച്ചുവിട്ടു.
മുതിർന്ന ആൺ ചിമ്പാൻസികളെയും കുഞ്ഞുങ്ങളെയുമാണ് ഇവർ പ്രധാനമായും ലക്ഷ്യം വെച്ചത്. കടിക്കുക, ചവിട്ടുക, നിലത്തിട്ട് അടിക്കുക തുടങ്ങിയ ക്രൂരമായ രീതികളിലൂടെയാണ് ഇവർ സ്വന്തം വർഗ്ഗക്കാരെ കൊലപ്പെടുത്തിയത്. ചിമ്പാൻസികളുടെ എണ്ണം അമിതമായി വർദ്ധിച്ചതും ഭക്ഷണത്തിനായുള്ള മത്സരവുമാണ് ഈ ഭിന്നതയ്ക്ക് കാരണമായതെന്ന് കരുതപ്പെടുന്നു. കൂടാതെ, 2014-ലും 2017-ലും പടർന്നുപിടിച്ച രോഗബാധ മൂലം പല അംഗങ്ങളും ചത്തത് ഇവരുടെ സാമൂഹിക ബന്ധങ്ങളെ തകർത്തു. ആൺ ചിമ്പാൻസികൾക്കിടയിലെ അധികാര തർക്കവും ഈ ‘ആഭ്യന്തര യുദ്ധത്തിന്’ ആക്കം കൂട്ടി.
മനുഷ്യരുടെ ഇടപെടലില്ലാത്ത സ്വാഭാവിക സാഹചര്യത്തിൽ ചിമ്പാൻസികൾക്കിടയിൽ ഇത്തരമൊരു വംശഹത്യ നടക്കുന്നത് ആദ്യമായാണ് ശാസ്ത്രീയമായി രേഖപ്പെടുത്തുന്നത്. മനുഷ്യരോട് ജനിതകമായി ഏറെ സാമ്യമുള്ള ഇവരുടെ ഈ പെരുമാറ്റം പരിണാമ സംബന്ധമായ വലിയ ചോദ്യങ്ങളാണ് ഉയർത്തുന്നത്. എങ്കിലും മനുഷ്യരിലെ യുദ്ധങ്ങളുമായി ഇതിനെ നേരിട്ട് താരതമ്യം ചെയ്യരുതെന്ന് ഗവേഷകർ മുന്നറിയിപ്പ് നൽകുന്നു.
Summary: Researchers at Kibale National Park in Uganda have documented a rare and violent split within the Ngogo chimpanzee group, which was once the largest known wild community. After decades of stability, the group fractured into two factions in 2017. Since then, the “Western” group has launched coordinated attacks against the “Central” group, killing 28 members, including adult males and infants. Scientists believe overcrowding, competition for food, and social disruption caused by disease led to this unprecedented lethal aggression among former allies.
