ന്യൂയോർക്ക്: ഫേസ്ബുക്ക് മെസഞ്ചറിൽ എൻക്രിപ്ഷൻ നടപ്പിലാക്കാനുള്ള മെറ്റയുടെ തീരുമാനം കുട്ടികൾക്കെതിരെയുള്ള ലൈംഗികാതിക്രമങ്ങൾ റിപ്പോർട്ട് ചെയ്യാനുള്ള കമ്പനിയുടെ ശേഷിയെ ബാധിക്കുമെന്ന് സ്വന്തം ഉദ്യോഗസ്ഥർ തന്നെ മുന്നറിയിപ്പ് നൽകിയിരുന്നതായി വെളിപ്പെടുത്തൽ (Meta Facebook Messenger Encryption). മെറ്റയുടെ കണ്ടന്റ് പോളിസി വിഭാഗം മേധാവി മോണിക്ക ബിക്കെർട്ട് ഉൾപ്പെടെയുള്ളവർ ഈ നീക്കം ‘അങ്ങേയറ്റം നിരുത്തരവാദിത്തപരമാണ്’ എന്ന് വിശേഷിപ്പിച്ചിരുന്നു. ന്യൂ മെക്സിക്കോ സ്റ്റേറ്റ് കോടതിയിൽ സമർപ്പിച്ച ആന്തരിക രേഖകളിലൂടെയാണ് ഈ വിവരങ്ങൾ പുറത്തുവന്നത്.
2019-ൽ എൻക്രിപ്ഷൻ പ്ലാൻ തയ്യാറാക്കുന്ന സമയത്ത്, ഇതിലൂടെ കുട്ടികളെ ചൂഷണം ചെയ്യുന്ന കേസുകൾ കണ്ടെത്താനാവില്ലെന്ന് മെറ്റയിലെ ഉന്നത സുരക്ഷാ ഉദ്യോഗസ്ഥർ ആശങ്ക പ്രകടിപ്പിച്ചിരുന്നു. സന്ദേശങ്ങൾ എൻക്രിപ്റ്റ് ചെയ്യപ്പെടുന്നതോടെ ഭീകരാക്രമണ പദ്ധതികളോ ബാലപീഡന ദൃശ്യങ്ങളോ മുൻകൂട്ടി കണ്ടെത്താൻ കമ്പനിക്ക് കഴിയില്ലെന്ന് ബിക്കെർട്ട് ചൂണ്ടിക്കാട്ടി. ഒരു ഇന്റേണൽ ബ്രീഫിംഗ് അനുസരിച്ച്, എൻക്രിപ്ഷൻ നടപ്പിലാക്കിയാൽ ബാലലൈംഗിക ചൂഷണവുമായി ബന്ധപ്പെട്ട റിപ്പോർട്ടിംഗിൽ 65 ശതമാനം കുറവുണ്ടാകുമെന്ന് കമ്പനി തന്നെ കണക്കാക്കിയിരുന്നു. ഏകദേശം 600-ഓളം ബാലപീഡന കേസുകളും 150-ഓളം തീവ്രവാദ കേസുകളും നിയമപാലകർക്ക് കൈമാറാൻ കഴിയാത്ത സാഹചര്യം ഇത് സൃഷ്ടിക്കുമെന്ന് രേഖകൾ വ്യക്തമാക്കുന്നു.
അതേസമയം, ഉപയോക്താക്കളുടെ സ്വകാര്യത സംരക്ഷിക്കുന്നതിന്റെ ഭാഗമായാണ് എൻക്രിപ്ഷൻ നടപ്പിലാക്കിയതെന്നാണ് മെറ്റയുടെ ഔദ്യോഗിക വിശദീകരണം. 2019-ൽ ഉയർന്നുവന്ന ഈ ആശങ്കകൾ പരിഗണിച്ചാണ് 2023-ൽ എൻക്രിപ്ഷൻ ലോഞ്ച് ചെയ്യുന്നതിന് മുൻപ് കുട്ടികളുടെ സുരക്ഷയ്ക്കായി പുതിയ ഫീച്ചറുകൾ ഉൾപ്പെടുത്തിയതെന്ന് മെറ്റ വക്താവ് ആൻഡി സ്റ്റോൺ പറഞ്ഞു. അപരിചിതരായ മുതിർന്നവർക്ക് പ്രായപൂർത്തിയാകാത്ത കുട്ടികളെ മെസഞ്ചറിൽ നേരിട്ട് ബന്ധപ്പെടാൻ കഴിയില്ലെന്നും, കുറ്റകരമായ സന്ദേശങ്ങൾ ഉപയോക്താക്കൾക്ക് തന്നെ റിപ്പോർട്ട് ചെയ്യാമെന്നും കമ്പനി അവകാശപ്പെടുന്നു. എന്നാൽ, കുട്ടികളുടെ മാനസികാരോഗ്യത്തെയും സുരക്ഷയെയും മെറ്റാ ഉൽപ്പന്നങ്ങൾ ദോഷകരമായി ബാധിക്കുന്നു എന്നാരോപിച്ച് 40-ലധികം അറ്റോർണി ജനറൽമാർ കമ്പനിക്കെതിരെ നിയമനടപടികളുമായി മുന്നോട്ട് പോവുകയാണ്.
Summary: Internal Meta documents revealed that top executives warned that encrypting Facebook Messenger was “irresponsible” as it would hinder the detection of child exploitation cases.
