2022 ഫെബ്രുവരി 24-ന് പുലർച്ചെ റഷ്യൻ ടാങ്കുകൾ ഉക്രെയ്ൻ അതിർത്തി കടക്കുമ്പോൾ ലോകം കരുതിയത് ഏതാനം ദിവസങ്ങൾ കൊണ്ട് ഈ പോരാട്ടം അവസാനിക്കുമെന്നാണ്. എന്നാൽ നാലു വർഷങ്ങൾക്കിപ്പുറവും അറുതിയില്ലാത്ത യുദ്ധമായി ഇത് തുടരുന്നു (Four Years Of Russia Ukraine War). രണ്ടാം ലോകമഹായുദ്ധത്തിന് ശേഷം യൂറോപ്പ് കണ്ട ഏറ്റവും വലിയ മാനുഷിക ദുരന്തമായി മാറിയ ഈ യുദ്ധം, ആഗോള സാമ്പത്തിക ക്രമത്തെയും സുരക്ഷാ സമവാക്യങ്ങളെയും അടിമുടി മാറ്റിമറിച്ചു. അഞ്ചാം വർഷത്തിലേക്ക് യുദ്ധം പ്രവേശിക്കുമ്പോൾ ഇരുരാജ്യങ്ങളും കടുത്ത സാമ്പത്തിക-സാമൂഹിക തകർച്ചയെയാണ് നേരിടുന്നത്.
യുദ്ധത്തിന്റെ ആഘാതം വ്യക്തമാക്കുന്ന ചില കണക്കുകൾ താഴെ പറയുന്നവയാണ്. യുദ്ധത്തിൽ കൊല്ലപ്പെട്ടവരുടെ കൃത്യമായ കണക്ക് ഇരുരാജ്യങ്ങളും പുറത്തുവിട്ടിട്ടില്ലെങ്കിലും, ആകെ മരണം 5 ലക്ഷം കടന്നതായി അന്താരാഷ്ട്ര ഏജൻസികൾ വിലയിരുത്തുന്നത്. ഉക്രെയ്നിലെ അടിസ്ഥാന സൗകര്യങ്ങളുടെ നാശനഷ്ടം ഏകദേശം 150 ബില്യൺ ഡോളറിലധികം വരും. ഉക്രെയ്നിലെ 10 ദശലക്ഷത്തിലധികം ആളുകൾ പലായനം ചെയ്യപ്പെട്ടു, ഇതിൽ 6 ദശലക്ഷത്തിലധികം പേർ വിദേശ രാജ്യങ്ങളിൽ അഭയാർത്ഥികളായി കഴിയുകയാണ്. റഷ്യയുടെ പ്രതിരോധ ബജറ്റ് അവരുടെ ജിഡിപിയുടെ 6 ശതമാനത്തിലധികം വർദ്ധിപ്പിക്കേണ്ടി വന്നു.
റഷ്യയുടെ ഉള്ളിലും യുദ്ധത്തിന്റെ പ്രത്യാഘാതങ്ങൾ ദൃശ്യമാണ്. യുദ്ധച്ചെലവ് കണ്ടെത്താനായി റഷ്യയിൽ വാറ്റ് (VAT) 22 ശതമാനമായി ഉയർത്തി. പടിഞ്ഞാറൻ രാജ്യങ്ങളുടെ കടുത്ത ഉപരോധങ്ങൾക്കിടയിലും റഷ്യൻ സമ്പദ്വ്യവസ്ഥ പിടിച്ചുനിൽക്കാൻ ശ്രമിക്കുന്നുണ്ടെങ്കിലും സാധാരണക്കാർക്കിടയിൽ 15-20 ശതമാനം വരെ വിലക്കയറ്റം അനുഭവപ്പെടുന്നുണ്ട്. ഉക്രെയ്ൻ ഡ്രോൺ ആക്രമണങ്ങൾ ശക്തമാക്കിയതോടെ അതിർത്തിയിൽ നിന്നും 500 കിലോമീറ്റർ വരെ ദൂരെയുള്ള റഷ്യൻ നഗരങ്ങളിൽ വ്യോമാക്രമണ ഷെൽട്ടറുകൾ സ്ഥാപിക്കേണ്ടി വന്നു. ഇത് റഷ്യൻ ജനതയ്ക്കിടയിൽ യുദ്ധഭീതി വർദ്ധിപ്പിക്കുന്നു.
ഉക്രെയ്നാകട്ടെ, പാശ്ചാത്യ രാജ്യങ്ങളുടെ സൈനിക സഹായത്തിലാണ് പിടിച്ചുനിൽക്കുന്നത്. അമേരിക്കയും നാറ്റോ രാജ്യങ്ങളും നൽകുന്ന കോടിക്കണക്കിന് ഡോളറിന്റെ ആയുധങ്ങൾ ഉക്രെയ്നെ പ്രതിരോധിക്കാൻ സഹായിക്കുന്നുണ്ടെങ്കിലും രാജ്യം വലിയൊരു കടക്കെണിയിലേക്ക് നീങ്ങിക്കൊണ്ടിരിക്കുകയാണ്. ഉക്രെയ്നിലെ കൃഷിഭൂമികൾ പലതും യുദ്ധക്കളങ്ങളായതോടെ ആഗോള ഭക്ഷ്യ വിപണിയിലും വലിയ തടസ്സങ്ങളുണ്ടായി. ഗോതമ്പ്, സൂര്യകാന്തി എണ്ണ എന്നിവയുടെ കയറ്റുമതിയിൽ ഉണ്ടായ കുറവ് ആഫ്രിക്കൻ രാജ്യങ്ങളിലുൾപ്പെടെ ദാരിദ്ര്യം വർദ്ധിപ്പിച്ചു.
മഹായുദ്ധം നാലു വർഷം പിന്നിടുമ്പോൾ സമാധാന ചർച്ചകൾ ഇപ്പോഴും ഫലം കാണാതെ തുടരുകയാണ്. കീഴടങ്ങാൻ ഉക്രെയ്നും പിന്മാറാൻ റഷ്യയും തയ്യാറാകാത്ത സാഹചര്യത്തിൽ യുദ്ധം ഇനിയും നീണ്ടുപോകാനാണ് സാധ്യത. ചൈന ഉൾപ്പെടെയുള്ള രാജ്യങ്ങൾ സമാധാന ശ്രമങ്ങൾ നടത്തുന്നുണ്ടെങ്കിലും ഫലപ്രദമായ ഒരു വെടിനിർത്തൽ പ്ലാൻ ഇതുവരെ രൂപപ്പെട്ടിട്ടില്ല. ലോകം മുഴുവൻ ഉറ്റുനോക്കുന്നത് ഈ യുദ്ധം എന്നവസാനിക്കും എന്നാണ്, കാരണം ഓരോ ദിവസവും നഷ്ടമാകുന്നത് ആയിരക്കണക്കിന് സാധാരണക്കാരുടെ ജീവിതവും സ്വപ്നങ്ങളുമാണ്.
Summary: Four years since the full-scale invasion began, the Russia-Ukraine war has resulted in over 500,000 casualties and displaced millions. While Ukraine relies on Western aid for defense, Russia faces economic strain with high inflation and a VAT hike to 22%, with no immediate ceasefire in sight as the conflict enters its fifth year.
