ബ്രസൽസ്: അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ച പുതിയ ആഗോള ഇറക്കുമതി തീരുവകൾ അംഗീകരിക്കില്ലെന്ന് യൂറോപ്യൻ യൂണിയൻ (EU Rejects US Tariff Increase). കഴിഞ്ഞ വർഷം ഒപ്പുവെച്ച വ്യാപാര കരാറിലെ വ്യവസ്ഥകൾ അമേരിക്ക പാലിക്കണമെന്ന് യൂറോപ്യൻ കമ്മീഷൻ ഞായറാഴ്ച ആവശ്യപ്പെട്ടു. ‘ഒരു കരാർ എന്നാൽ അത് കരാർ തന്നെയാണ്’ (A deal is a deal) എന്ന് വ്യക്തമാക്കിയ കമ്മീഷൻ, നികുതി വർദ്ധിപ്പിക്കാനുള്ള നീക്കം അംഗീകരിക്കാനാവില്ലെന്ന് വാഷിംഗ്ടണിനെ അറിയിച്ചു.
ട്രംപിന്റെ പഴയ നികുതി നയങ്ങൾ അമേരിക്കൻ സുപ്രീം കോടതി റദ്ദാക്കിയതിന് പിന്നാലെയാണ് അദ്ദേഹം 15% ആഗോള നികുതി പുതുതായി പ്രഖ്യാപിച്ചത്. ഇത് നിലവിലുള്ള വ്യാപാര കരാറുകൾക്ക് വിരുദ്ധമാണെന്ന് യൂറോപ്യൻ യൂണിയൻ ചൂണ്ടിക്കാട്ടി. കഴിഞ്ഞ വർഷത്തെ കരാർ പ്രകാരം മിക്ക യൂറോപ്യൻ ഉൽപ്പന്നങ്ങൾക്കും 15% നികുതി പരിധി നിശ്ചയിച്ചിരുന്നു. ചില ഉൽപ്പന്നങ്ങൾക്ക് പൂജ്യം നികുതിയും അനുവദിച്ചിരുന്നു. പുതിയ സാഹചര്യത്തിൽ ഈ പരിധി ലംഘിക്കാൻ പാടില്ലെന്നാണ് യൂറോപ്യൻ യൂണിയന്റെ നിലപാട്.
അപ്രതീക്ഷിതമായ ഇത്തരം നികുതി വർദ്ധനവുകൾ ആഗോള വിപണിയിലെ വിശ്വാസ്യത തകർക്കുമെന്നും സാമ്പത്തിക അനിശ്ചിതത്വത്തിന് വഴിവെക്കുമെന്നും കമ്മീഷൻ പ്രസ്താവനയിൽ പറഞ്ഞു. യൂറോപ്യൻ ട്രേഡ് കമ്മീഷണർ മാരോസ് സെഫ്കോവിച്ച് അമേരിക്കൻ പ്രതിനിധികളുമായി ശനിയാഴ്ച ഇക്കാര്യം ചർച്ച ചെയ്തിട്ടുണ്ട്. അമേരിക്കയുടെ ഭാഗത്തുനിന്ന് കൃത്യമായ വിശദീകരണം ലഭിക്കണമെന്നും യൂറോപ്യൻ ഉൽപ്പന്നങ്ങൾക്ക് മുൻപ് നിശ്ചയിച്ചതിലും കൂടുതൽ നികുതി ചുമത്തുന്നത് അംഗീകരിക്കില്ലെന്നും യൂറോപ്യൻ യൂണിയൻ ആവർത്തിച്ചു. അമേരിക്കൻ നടപടിക്കെതിരെ തിരിച്ചടിക്കാനുള്ള സാധ്യതകളും യൂറോപ്യൻ രാജ്യങ്ങൾ ആലോചിക്കുന്നുണ്ട്.
Summary: The European Commission has demanded that the U.S. adhere to last year’s trade agreement following President Trump’s announcement of new 15% global tariffs.
