Follow on Google News
ബുഡാപെസ്റ്റ്: ഹംഗറിയിൽ വിക്ടർ ഓർബന്റെ ഭരണത്തിന് അന്ത്യം. ഏപ്രിൽ 12-ന് നടന്ന പൊതുതിരഞ്ഞെടുപ്പിൽ പീറ്റർ മഗ്യാറിന്റെ നേതൃത്വത്തിലുള്ള പ്രതിപക്ഷ കക്ഷിയായ ‘തിസ’ പാർട്ടി വൻ വിജയം നേടി. തീവ്ര വലതുപക്ഷ നിലപാടുകാരനായ വിക്ടർ ഓർബന്റെ ഫിഡെസ് പാർട്ടിയെ ബഹുദൂരം പിന്നിലാക്കിയാണ് തിസ പാർട്ടി അധികാരം പിടിച്ചടക്കിയത്.(End of the Orban era, Historic victory for Péter Magyar and the Tisza party in Hungary)
ഏറ്റവും ഒടുവിൽ റിപ്പോർട്ട് ലഭിക്കുമ്പോൾ, 51 ശതമാനം വോട്ടുകൾ നേടിയാണ് തിസ പാർട്ടി മുന്നേറുന്നത്. ഭരണകക്ഷിയായ ഫിഡെസ് പാർട്ടിക്ക് 40 ശതമാനം വോട്ടുകൾ മാത്രമേ നേടാനായുള്ളൂ. പാർലമെന്റിൽ മൂന്നിൽ രണ്ട് ഭൂരിപക്ഷം നേടാൻ സാധിക്കുമെന്നതിനാൽ രാജ്യത്തിന്റെ ഭരണഘടനയിൽ ഉൾപ്പെടെ നിർണായക മാറ്റങ്ങൾ വരുത്താൻ പീറ്റർ മഗ്യാറിന് സാധിക്കും.
ഒരുകാലത്ത് വിക്ടർ ഓർബന്റെ ഏറ്റവും അടുത്ത അനുയായിയും സർക്കാരിലെ പ്രധാനിയുമായിരുന്നു പീറ്റർ മഗ്യാർ. എന്നാൽ സർക്കാരിലെ അഴിമതിയിലും ജനാധിപത്യ വിരുദ്ധതയിലും പ്രതിഷേധിച്ച് പാർട്ടി വിട്ട അദ്ദേഹം ഏതാനും മാസങ്ങൾക്കുള്ളിൽ രാജ്യത്തെ ഏറ്റവും വലിയ ജനകീയ നേതാവായി വളരുകയായിരുന്നു. ഓർബന്റെ റഷ്യൻ അനുകൂല നിലപാടുകൾക്ക് വിരുദ്ധമായി യൂറോപ്യൻ യൂണിയനോട് ചേർന്നുനിൽക്കുന്ന നയമാണ് പീറ്റർ മഗ്യാറിന്റേത്. ഓർബന്റെ പരാജയം റഷ്യക്കെതിരായ യൂറോപ്പിന്റെ നിലപാടുകൾക്ക് കൂടുതൽ കരുത്ത് പകരുമെന്നാണ് അന്താരാഷ്ട്ര നിരീക്ഷകർ വിലയിരുത്തുന്നത്.
ഹംഗറിയുടെ ചരിത്രത്തിലെ ഏറ്റവും ഉയർന്ന പോളിംഗിനാണ് ഈ തിരഞ്ഞെടുപ്പ് സാക്ഷ്യം വഹിച്ചത് (77%). മാറ്റത്തിന് വേണ്ടിയുള്ള ജനങ്ങളുടെ ആവേശമാണ് ഈ പോളിംഗ് ശതമാനത്തിൽ പ്രതിഫലിച്ചത്. ഹംഗറിയിലെ ജനങ്ങൾ ഭയത്തെ തോൽപ്പിച്ചിരിക്കുന്നു. നമ്മൾ ഒരു പുതിയ സ്വതന്ത്ര ഹംഗറിയിലേക്ക് പ്രവേശിക്കുകയാണ്, പീറ്റർ മഗ്യാർ പറഞ്ഞു.
