ബീജിങ്: അമിത ചൂടുള്ള ഭക്ഷണം പെട്ടെന്ന് വിഴുങ്ങുന്നത് ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്ന് മുന്നറിയിപ്പ് നൽകി ചൈനയിൽ നിന്നൊരു വാർത്ത. തിളച്ചുമറിയുന്ന ‘ഹോട്ട്പോട്ട്’ ഭക്ഷണം തണുക്കാൻ കാത്തുനിൽക്കാതെ വേഗത്തിൽ കഴിച്ച 42-കാരിയായ ചൈനീസ് യുവതിയുടെ അന്നനാളത്തിൽ 8 സെന്റീമീറ്റർ നീളമുള്ള വലിയ അൾസർ രൂപപ്പെട്ടു (Chinese Woman Oesophageal Ulcer). ചൈനയിലെ ഹുനാൻ പ്രവിശ്യയിലാണ് ഞെട്ടിക്കുന്ന ഈ സംഭവമുണ്ടായത്.
സുഹൃത്തുക്കൾക്കൊപ്പം ഹോട്ട്പോട്ട് റെസ്റ്റോറന്റിൽ ഭക്ഷണം കഴിക്കാനെത്തിയ യുവതി, തിളയ്ക്കുന്ന പാത്രത്തിൽ നിന്ന് നേരിട്ട് ഭക്ഷണസാധനങ്ങൾ എടുത്ത് വേഗത്തിൽ വിഴുങ്ങുകയായിരുന്നു. ഇതിന് പിന്നാലെ നെഞ്ചെരിച്ചിലും തൊണ്ടയിൽ കടുത്ത വേദനയും അനുഭവപ്പെട്ടതിനെ തുടർന്ന് ആശ്വാസത്തിനായി ഇവർ ഐസ് വെള്ളം കുടിച്ചു. എന്നാൽ അടുത്ത ദിവസം വെള്ളം പോലും വിഴുങ്ങാൻ കഴിയാത്തവിധം അവസ്ഥ വഷളായതോടെ ഇവരെ ആശുപത്രിയിൽ പ്രവേശിപ്പിച്ചു. ഡോക്ടർമാർ നടത്തിയ എൻഡോസ്കോപ്പിയിലാണ് അന്നനാളത്തിന്റെ മൂന്നിലൊന്ന് നീളത്തിൽ കടുത്ത പൊള്ളലേറ്റതായും അൾസർ രൂപപ്പെട്ടതായും കണ്ടെത്തിയത്.
അന്നനാളിക്ക് പരമാവധി 50-60 ഡിഗ്രി സെൽഷ്യസ് വരെയുള്ള ചൂട് മാത്രമേ താങ്ങാൻ കഴിയൂ എന്ന് ആരോഗ്യവിദഗ്ദ്ധർ വ്യക്തമാക്കുന്നു. എന്നാൽ പുതുതായി പാകം ചെയ്ത ഹോട്ട്പോട്ട് വിഭവങ്ങളുടെ ചൂട് 80 മുതൽ 90 ഡിഗ്രി സെൽഷ്യസ് വരെയാകാം. ചൂടുള്ള ഭക്ഷണം കഴിച്ചയുടൻ തണുത്ത വെള്ളം കുടിക്കുന്നത് ടിഷ്യൂകളെ കൂടുതൽ തകരാറിലാക്കുമെന്നും ഡോക്ടർമാർ മുന്നറിയിപ്പ് നൽകുന്നു. ലോകാരോഗ്യ സംഘടനയുടെ കാൻസർ ഗവേഷണ ഏജൻസി 65 ഡിഗ്രി സെൽഷ്യസിന് മുകളിലുള്ള പാനീയങ്ങളെയും ഭക്ഷണങ്ങളെയും കാൻസറിന് കാരണമായേക്കാവുന്നവയുടെ പട്ടികയിലാണ് ഉൾപ്പെടുത്തിയിരിക്കുന്നത്.
Summary: A 42-year-old Chinese woman from Hunan province developed a massive 8-centimetre ulcer in her oesophagus after hurriedly eating piping hot hotpot food without letting it cool down. Experiencing severe chest pain and burning, she drank ice-cold water for relief, which experts say further irritated the damaged tissues. An endoscopy later revealed the ulcer, spanning nearly one-third of her food pipe. Doctors warned that the oesophageal lining can only withstand temperatures around 50-60°C, whereas fresh hotpot items can exceed 80-90°C, increasing the risk of internal burns and long-term complications.
