വാഷിംഗ്ടൺ: പശ്ചിമേഷ്യയിൽ ഇറാനും അമേരിക്കയും തമ്മിലുള്ള ബന്ധം അതീവ ഗുരുതരമായ ഘട്ടത്തിലേക്ക്. ഇറാൻ ഭരണകൂടം വിട്ടുവീഴ്ചകൾക്കും ചർച്ചകൾക്കും തയ്യാറാണെന്ന സൂചന നൽകുന്നതായി അമേരിക്കൻ പ്രസിഡന്റ് ഡോണൾഡ് ട്രംപ് വെളിപ്പെടുത്തി. വിട്ടുവീഴ്ചയ്ക്കായി ഇറാനിൽ നിന്ന് നിരവധി തവണ ഫോൺ കോളുകൾ വന്നതായും അദ്ദേഹം അവകാശപ്പെട്ടു. എന്നാൽ, നയതന്ത്ര നീക്കങ്ങൾക്കിടയിലും സൈനിക ശക്തി പ്രകടിപ്പിക്കാനാണ് വൈറ്റ് ഹൗസിന്റെ നീക്കം.(Iran is ready for talks and compromises, Trump)
ഇറാനിലെ ആഭ്യന്തര പ്രക്ഷോഭങ്ങളെ അടിച്ചമർത്തുന്നതിൽ മുന്നറിയിപ്പുമായി അമേരിക്കയുടെ കൂറ്റൻ നാവികവ്യൂഹം പേർഷ്യൻ ഗൾഫിലേക്ക് അടുക്കുകയാണ്. വിമാനവാഹിനിക്കപ്പലായ യു.എസ്.എസ്. എബ്രഹാം ലിങ്കൺ, ടോമഹോക്ക് മിസൈലുകൾ വഹിക്കുന്ന മൂന്ന് ഡിസ്ട്രോയർ കപ്പലുകൾ എന്നിവയാണ് മേഖലയിലേക്ക് നീങ്ങുന്നത്. ജനുവരി 26-ഓടെ ഈ നാവികവ്യൂഹം യു.എസ്. സെൻട്രൽ കമാൻഡിന്റെ പരിധിയിൽ പ്രവേശിച്ചു.
അമേരിക്കൻ വ്യോമസേനയുടെ നേതൃത്വത്തിൽ വൻതോതിലുള്ള സൈനികാഭ്യാസങ്ങളും മേഖലയിൽ പ്രഖ്യാപിച്ചിട്ടുണ്ട്. ഒരു ഡസനോളം എഫ്-15ഇ യുദ്ധവിമാനങ്ങളും മേഖലയിൽ വിന്യസിക്കപ്പെട്ടിട്ടുണ്ട്.
സാമ്പത്തിക തകർച്ചയെത്തുടർന്ന് ഇറാനിൽ ആരംഭിച്ച ജനകീയ പ്രക്ഷോഭം ഇപ്പോഴും തുടരുകയാണ്. ജനുവരി ആദ്യവാരം മുതൽ ഇറാനിൽ ഇന്റർനെറ്റ് സേവനങ്ങൾ ഭരണകൂടം വിച്ഛേദിച്ചിരിക്കുകയാണ്. പുറംലോകം അറിയാതെ വലിയ രീതിയിലുള്ള അടിച്ചമർത്തലുകൾ നടക്കുന്നതായി മനുഷ്യാവകാശ സംഘടനകൾ ആരോപിക്കുന്നു. മൂവായിരത്തിലധികം പേർ ഇതിനോടകം കൊല്ലപ്പെട്ടതായാണ് ഔദ്യോഗിക കണക്കുകൾ, എന്നാൽ യഥാർത്ഥ സംഖ്യ ഇതിലും കൂടുതലാകാൻ സാധ്യതയുണ്ടെന്ന് റിപ്പോർട്ടുകൾ സൂചിപ്പിക്കുന്നു.
ഇറാൻ ആണവായുധങ്ങൾ നിർമ്മിക്കുന്നത് തടയുകയാണ് തന്റെ ലക്ഷ്യമെന്ന് ട്രംപ് ആവർത്തിച്ചു. അതേസമയം, ഇറാനിലെ ഭരണമാറ്റത്തെക്കുറിച്ച് അദ്ദേഹം നേരിട്ട് പ്രതികരിച്ചിട്ടില്ല. “ഞങ്ങൾ അവരെ നിരീക്ഷിക്കുകയാണ്. ഒരു വലിയ സൈന്യം തന്നെ ഇറാൻ ലക്ഷ്യമാക്കി നീങ്ങുന്നുണ്ട്. ഒരുപക്ഷേ അത് ഉപയോഗിക്കേണ്ടി വരില്ലായിരിക്കാം,” ട്രംപ് ഡാവോസിൽ നിന്ന് മടങ്ങവെ മാധ്യമങ്ങളോട് പറഞ്ഞു.
