ഓസ്റ്റിൻ: വിദേശി തൊഴിലാളികൾക്ക് അമേരിക്കയിൽ ജോലി ചെയ്യാൻ അനുമതി നൽകുന്ന എച്ച്-1ബി വിസയുടെ പുതിയ അപേക്ഷകൾ മരവിപ്പിക്കാൻ ടെക്സസ് ഗവർണർ ഗ്രെഗ് അബോട്ട് ഉത്തരവിട്ടു. ടെക്സസിലെ സർക്കാർ ഏജൻസികളിലും പൊതു സർവ്വകലാശാലകളിലുമാണ് നിയന്ത്രണം ഏർപ്പെടുത്തിയിരിക്കുന്നത്.(Texas Governor Calls for Freeze of H-1B Visas)
അമേരിക്കൻ പൗരന്മാരുടെ തൊഴിൽ സുരക്ഷ ഉറപ്പാക്കുന്നതിന്റെ ഭാഗമായാണ് ഈ നീക്കമെന്ന് റിപ്പബ്ലിക്കൻ ഗവർണറായ അബോട്ട് വ്യക്തമാക്കി. 2027 മെയ് 31 വരെയാണ് പുതിയ അപേക്ഷകൾക്കുള്ള ഈ വിലക്ക് പ്രാബല്യത്തിലുള്ളത്. ഇനി മുതൽ ഗവർണർ നിശ്ചയിക്കുന്ന സർക്കാർ ഏജൻസികൾക്കോ പൊതു ഉന്നത വിദ്യാഭ്യാസ സ്ഥാപനങ്ങൾക്കോ ‘ടെക്സസ് വർക്ക്ഫോഴ്സ് കമ്മീഷന്റെ’ രേഖാമൂലമുള്ള അനുമതിയില്ലാതെ പുതിയ വിസ അപേക്ഷകൾ നൽകാനാവില്ല.
എല്ലാ സർക്കാർ സ്ഥാപനങ്ങളും സർവ്വകലാശാലകളും 2026 മാർച്ച് 27-നകം നിലവിലുള്ള വിദേശ തൊഴിലാളികളുടെ എണ്ണം, അവരുടെ രാജ്യം, തൊഴിൽ തരം എന്നിവ വ്യക്തമാക്കുന്ന വിശദമായ റിപ്പോർട്ട് സമർപ്പിക്കണം. വിദേശികളെ നിയമിക്കുന്നതിന് മുൻപ് യോഗ്യരായ അമേരിക്കൻ തൊഴിലാളികളെ കണ്ടെത്താൻ എന്ത് ശ്രമം നടത്തി എന്നതും റിപ്പോർട്ടിൽ വ്യക്തമാക്കണം.
കുറഞ്ഞ വേതനത്തിന് വിദേശികളെ നിയമിക്കാൻ എച്ച്-1ബി വിസ ദുരുപയോഗം ചെയ്യപ്പെടുന്നുണ്ടെന്ന് ഗവർണർ ആരോപിച്ചു. ചില സ്ഥാപനങ്ങൾ അമേരിക്കൻ തൊഴിലാളികളെ പിരിച്ചുവിട്ട് പകരം വിദേശികളെ നിയമിക്കുന്ന സാഹചര്യം അനുവദിക്കില്ലെന്നും അദ്ദേഹം കൂട്ടിച്ചേർത്തു.”അമേരിക്കൻ തൊഴിലുകൾ അമേരിക്കക്കാർക്ക് തന്നെ ലഭിക്കണം. ടെക്സസിലെ സമ്പദ്വ്യവസ്ഥ ഇവിടുത്തെ തൊഴിലാളികൾക്കും തൊഴിലുടമകൾക്കും പ്രയോജനകരമാകണം.” – ഗ്രെഗ് അബോട്ട്
അമേരിക്ക അനുവദിക്കുന്ന ആകെ എച്ച്-1ബി വിസകളിൽ ഭൂരിഭാഗവും സ്വന്തമാക്കുന്നത് ഇന്ത്യൻ പൗരന്മാരാണ്. ട്രംപ് ഭരണകൂടം വിസ ഫീസായി ഒരു ലക്ഷം ഡോളർ ഏർപ്പെടുത്തിയതിന് പിന്നാലെ ടെക്സസ് കൂടി കർശന നിയന്ത്രണം കൊണ്ടുവരുന്നത് ഐടി മേഖലയിലെ ഇന്ത്യൻ പ്രൊഫഷണലുകൾക്ക് വലിയ തിരിച്ചടിയാകും.
