ഇന്ത്യയിലെ ഏറ്റവും പ്രിയപ്പെട്ട സ്ട്രീറ്റ് ഫുഡുകളിൽ ഒന്നാണ് പാനി പൂരി (Pani Puri Recipe). ക്രിസ്പിയായ പുരിക്കുള്ളിൽ ഉരുളക്കിഴങ്ങും മസാലയും നിറച്ച്, പുളിയും എരിവും മധുരവും കലർന്ന വെള്ളത്തിൽ മുക്കി കഴിക്കുമ്പോഴുള്ള ആ രുചി ഒന്ന് വേറെ തന്നെയാണ്. വടക്കേ ഇന്ത്യയിൽ ‘ഗോൾഗപ്പ’ എന്നും ബംഗാളിൽ ‘പുച്ച്ക’ എന്നും അറിയപ്പെടുന്ന ഈ വിഭവം എങ്ങനെ എളുപ്പത്തിൽ വീട്ടിലുണ്ടാക്കാം എന്ന് നോക്കാം.
ആവശ്യമായ സാധനങ്ങൾ:
1. മസാല വെള്ളം (പാനി) തയ്യാറാക്കാൻ:
മല്ലിയില – 1 കപ്പ്
പുതിനയില – 1/2 കപ്പ്
പച്ചമുളക് – 2 അല്ലെങ്കിൽ 3
ഇഞ്ചി – 1 ഇഞ്ച് കഷ്ണം
പുളി – 1 ടേബിൾസ്പൂൺ
ശർക്കര പൊടിച്ചത് – 3 മുതൽ 4 ടേബിൾസ്പൂൺ വരെ
വറുത്ത ജീരകപ്പൊടി – 1 ടീസ്പൂൺ
ചാറ്റ് മസാല – 1 ടീസ്പൂൺ
ഉപ്പ് – പാകത്തിന്
വെള്ളം – ആവശ്യത്തിന്
ബൂന്തി – 1 ടേബിൾസ്പൂൺ
2. ഉരുളക്കിഴങ്ങ് ഫില്ലിംഗിനായി:
ഉരുളക്കിഴങ്ങ് – 2-3 എണ്ണം (പുഴുങ്ങിയത്)
സവാള – 1 എണ്ണം (ചെറുതായി അരിഞ്ഞത്)
മല്ലിയില – ആവശ്യത്തിന്
മുളകുപൊടി – 1/4 ടീസ്പൂൺ
ചാറ്റ് മസാല – 1 ടീസ്പൂൺ
ജീരകപ്പൊടി – 1 ടീസ്പൂൺ
ഉപ്പ് – പാകത്തിന്
തയ്യാറാക്കുന്ന വിധം:
ഘട്ടം 1: മസാല വെള്ളം (പാനി) തയ്യാറാക്കാം
ആദ്യം മല്ലിയില, പുതിനയില, പച്ചമുളക്, ഇഞ്ചി എന്നിവ നന്നായി കഴുകി വൃത്തിയാക്കുക. ഇവ പുളി, ശർക്കര, ജീരകപ്പൊടി, ചാറ്റ് മസാല, ഉപ്പ് എന്നിവയ്ക്കൊപ്പം മിക്സിയിൽ അല്പം വെള്ളം ചേർത്ത് നന്നായി അരച്ചെടുക്കുക. ഈ മിശ്രിതം ഒരു പാത്രത്തിലേക്ക് മാറ്റി ഏകദേശം 2 മുതൽ 3 കപ്പ് വരെ വെള്ളം ചേർത്ത് നന്നായി യോജിപ്പിക്കുക. ഇതിലേക്ക് കുറച്ച് ബൂന്തി കൂടി ചേർത്ത ശേഷം ഫ്രിഡ്ജിൽ വെച്ച് തണുപ്പിക്കുക.
ഘട്ടം 2: ഉരുളക്കിഴങ്ങ് മസാല തയ്യാറാക്കാം
പുഴുങ്ങി വെച്ചിരിക്കുന്ന ഉരുളക്കിഴങ്ങ് തൊലി കളഞ്ഞ് ചെറിയ കഷ്ണങ്ങളായി ഉടച്ചെടുക്കുക. ഇതിലേക്ക് അരിഞ്ഞ സവാള, മല്ലിയില, മുളകുപൊടി, ചാറ്റ് മസാല, ജീരകപ്പൊടി, ഉപ്പ് എന്നിവ ചേർത്ത് നന്നായി കുഴയ്ക്കുക. ഉരുളക്കിഴങ്ങിന് പകരം വേവിച്ച ചെറുപയറോ വെള്ളക്കടലയോ വേണമെങ്കിലും ഉപയോഗിക്കാവുന്നതാണ്.
ഘട്ടം 3: വിളമ്പുന്ന രീതി
കടകളിൽ നിന്ന് വാങ്ങാൻ കിട്ടുന്ന പൂരിയുടെ മുകൾഭാഗം വിരൽ കൊണ്ട് ചെറുതായി പൊട്ടിക്കുക. അതിനുള്ളിൽ തയ്യാറാക്കി വെച്ചിരിക്കുന്ന ഉരുളക്കിഴങ്ങ് മസാല അല്പം നിറയ്ക്കുക. വേണമെങ്കിൽ മധുരമുള്ള പുളി ചട്ണി കൂടി ഇതിലേക്ക് ചേർക്കാം. ശേഷം തണുത്ത മസാല വെള്ളത്തിൽ (പാനി) മുക്കി ഉടൻ തന്നെ കഴിക്കുക.
