കൊൽക്കത്ത: പശ്ചിമ ബംഗാൾ രാഷ്ട്രീയത്തിൽ തൃണമൂൽ കോൺഗ്രസ് (TMC) സുപ്രധാന പ്രതിസന്ധികളിലൂടെ കടന്നുപോകുന്നതിനിടെ പാർട്ടി അധ്യക്ഷ മമത ബാനർജിക്ക് വീണ്ടും കനത്ത തിരിച്ചടി (Kolkata Mayor Firhad Hakim resigns TMC). മമതയുടെ ഏറ്റവും അടുത്ത വിശ്വസ്തനും തൃണമൂലിന്റെ പ്രമുഖ ന്യൂനപക്ഷ മുഖവുമായ ഫിർഹാദ് ഹക്കീം (Firhad Hakim) കൊൽക്കത്ത കോർപ്പറേഷൻ മേയർ സ്ഥാനം ഔദ്യോഗികമായി രാജിവെച്ചു. പാർട്ടിയിൽ നിന്നും പുറത്താക്കപ്പെട്ട ഋതബ്രത ബാനർജിയെ പ്രതിപക്ഷ നേതാവായി തിരഞ്ഞെടുത്തതിന് തൊട്ടുപിന്നാലെയാണ് മമതയെ ഞെട്ടിച്ചുകൊണ്ട് മേയറുടെ ഈ അടിയന്തിര രാജി.
സുവേന്ദു അധികാരിയുടെ (Suvendu Adhikari) നേതൃത്വത്തിൽ പശ്ചിമ ബംഗാളിൽ വൻ രാഷ്ട്രീയ അട്ടിമറിയിലൂടെ ബി.ജെ.പി സർക്കാർ അധികാരത്തിലേറ്റതിന് പിന്നാലെ, തനിക്ക് പദവിയിൽ സ്വതന്ത്രമായി പ്രവർത്തിക്കാൻ സാധിക്കുന്നില്ലെന്ന് ചൂണ്ടിക്കാട്ടി ഫിർഹാദ് ഹക്കീം നേരത്തെ തന്നെ പാർട്ടി നേതൃത്വത്തോട് രാജിവെയ്ക്കാനുള്ള അനുമതി തേടിയിരുന്നു. എന്നാൽ നിലവിലെ രാഷ്ട്രീയ സാഹചര്യത്തിൽ ഹക്കീം കൂടി രാജിവെയ്ക്കുന്നത് വലിയ ക്ഷീണമാകുമെന്ന് വിലയിരുത്തി മമത ബാനർജി ഇത് കർശനമായി തടയുകയായിരുന്നു. എന്നാൽ ബി.ജെ.പി ഭരണത്തിന് കീഴിൽ കോർപ്പറേഷൻ ഭരണം മുന്നോട്ട് കൊണ്ടുപോകാൻ കഴിയില്ലെന്ന നിലപാടിൽ ഉറച്ചുനിന്ന ഹക്കീം, വീണ്ടും മമതയെ സമീപിച്ച് കടുത്ത സമ്മർദ്ദം ചെലുത്തിയതിനൊടുവിലാണ് ഇപ്പോൾ രാജിക്ക് അനുവാദം നൽകിയതെന്ന് ടി.എം.സി എം.എൽ.എ കുനാൽ ഘോഷ് മാധ്യമങ്ങളെ അറിയിച്ചു.
കഴിഞ്ഞ 2018 മുതൽ കൊൽക്കത്തയുടെ മേയറായി നഗരഭരണം നിയന്ത്രിച്ചിരുന്നത് ഫിർഹാദ് ഹക്കീം ആയിരുന്നു. ഇതിന് പുറമെ മുൻപ് മമത ബാനർജി മന്ത്രിസഭകളിൽ നഗരവികസനം ഉൾപ്പെടെയുള്ള നിരവധി സുപ്രധാന വകുപ്പുകൾ കൈകാര്യം ചെയ്ത മുതിർന്ന നേതാവ് കൂടിയാണ് ഇദ്ദേഹം. ബി.ജെ.പി സർക്കാർ അധികാരത്തിലെത്തിയതോടെ ബംഗാളിലെ തൃണമൂലിന്റെ പ്രമുഖ കോട്ടകളെല്ലാം ഒന്നൊന്നായി തകരുന്ന കാഴ്ചയ്ക്കാണ് കൊൽക്കത്ത ഇപ്പോൾ സാക്ഷ്യം വഹിക്കുന്നത്.
Story Summary: In a major setback for TMC Chief Mamata Banerjee, Kolkata Mayor Firhad Hakim has resigned from his post, citing difficulties in functioning under the new Suvendu Adhikari-led BJP government in West Bengal.
