കൊൽക്കത്ത: പശ്ചിമ ബംഗാളിൽ ബലിപെരുന്നാളിനോട് (ബക്രീദ്) അനുബന്ധിച്ച് നൽകിയിരുന്ന രണ്ട് ദിവസത്തെ പൊതുഅവധി പുതിയ ബിജെപി (BJP) സർക്കാർ വെട്ടിക്കുറച്ചു (West Bengal Bakrid holiday cut). അവധി ഇനി മുതൽ ഒരു ദിവസമായിരിക്കുമെന്ന് വ്യക്തമാക്കി സംസ്ഥാന ധനകാര്യ വകുപ്പ് ഔദ്യോഗിക വിജ്ഞാപനം പുറത്തിറക്കി. പുതിയ ഉത്തരവ് പ്രകാരം 2026 മേയ് 28-ന് മാത്രമായിരിക്കും സംസ്ഥാനത്ത് ബക്രീദ് പ്രമാണിച്ചുള്ള ഏക പൊതുഅവധി ദിനം.
മുൻ മുഖ്യമന്ത്രി മമത ബാനർജിയുടെ നേതൃത്വത്തിലുള്ള തൃണമൂൽ കോൺഗ്രസ് (TMC) സർക്കാർ വർഷങ്ങളായി നടപ്പിലാക്കിയിരുന്ന അവധി ക്രമീകരണമാണ് മുഖ്യമന്ത്രി സുവേന്ദു അധികാരിയുടെ നേതൃത്വത്തിലുള്ള പുതിയ ബിജെപി സർക്കാർ റദ്ദാക്കിയത്. പെരുന്നാളിന് മുന്നോടിയായി മൃഗബലിക്ക് കടുത്ത നിയന്ത്രണങ്ങൾ ഏർപ്പെടുത്തിക്കൊണ്ട് സർക്കാർ പുറപ്പെടുവിച്ച മാർഗ്ഗനിർദ്ദേശങ്ങളെച്ചൊല്ലിയുള്ള രാഷ്ട്രീയ വിവാദങ്ങൾ കനക്കുന്നതിനിടയിലാണ് അവധി വെട്ടിക്കുറച്ചുകൊണ്ടുള്ള പുതിയ നീക്കം.
സംസ്ഥാനത്തെ ഔദ്യോഗിക ഹോളിഡേ കലണ്ടറിൽ ഭാഗികമായ ഭേദഗതി വരുത്തിയാണ് ധനകാര്യ വകുപ്പ് ഈ മാറ്റം വരുത്തിയത്. മുൻ തൃണമൂൽ സർക്കാർ തയ്യാറാക്കിയിരുന്ന 2026-ലെ അവധി പട്ടിക പ്രകാരം, പെരുന്നാളിന് തലേന്നുള്ള ദിവസവും പെരുന്നാൾ ദിനവും ഉൾപ്പെടെ തുടർച്ചയായ രണ്ട് ദിവസത്തെ അവധിക്ക് പൊതുമേഖലാ ജീവനക്കാർക്കും വിദ്യാഭ്യാസ സ്ഥാപനങ്ങൾക്കും അർഹതയുണ്ടായിരുന്നു.
എന്നാൽ ഈ മുൻ ഉത്തരവ് പൂർണ്ണമായും റദ്ദാക്കിയതായി പുതിയ വിജ്ഞാപനത്തിൽ പറയുന്നു. പുതിയ തീരുമാനപ്രകാരം മെയ് 28-ന് മാത്രമായിരിക്കും അവധി. ഇതിന് തൊട്ടുമുമ്പുള്ള ദിവസങ്ങളിൽ സർക്കാർ സംവിധാനങ്ങളും ഓഫീസുകളും വിദ്യാഭ്യാസ സ്ഥാപനങ്ങളും സാധാരണ രീതിയിൽ തന്നെ പ്രവർത്തിക്കുമെന്നും ഉത്തരവിൽ വ്യക്തമാക്കുന്നുണ്ട്. സർക്കാരിന്റെ ഈ നീക്കത്തിനെതിരെ സംസ്ഥാനത്തെ പ്രതിപക്ഷ പാർട്ടികളും വിവിധ കോണുകളും കടുത്ത പ്രതിഷേധവുമായി രംഗത്തെത്തിയിട്ടുണ്ട്.
Story Summary: The new BJP government in West Bengal led by Suvendu Adhikari has cut short the Bakrid (Id-ul-Zuha) public holiday from two days to one. As per the Finance Department’s notification, May 28, 2026, will be the only official holiday, scrapping the previous TMC government’s calendar.
