ചെന്നൈ: തമിഴ്നാട് സ്റ്റേറ്റ് മാർക്കറ്റിങ് കോർപറേഷൻ വഴി രാഷ്ട്രീയ പാർട്ടികൾ അനധികൃതമായി ഫണ്ട് പിരിക്കുന്നതിനും പണം വകമാറ്റുന്നതിനുമെതിരെ കടുത്ത മുന്നറിയിപ്പുമായി തമിഴ്നാട് മുഖ്യമന്ത്രി ജോസഫ് വിജയ് (Tamil Nadu TASMAC Illegal Party Fund Investigation). ടാസ്മാക് മദ്യവിൽപ്പനയിലൂടെ ലഭിക്കുന്ന മുഴുവൻ തുകയും കൃത്യമായി സംസ്ഥാന ഖജനാവിലേക്ക് തന്നെ എത്തുന്നുണ്ടെന്ന് ഉറപ്പാക്കണമെന്ന് മുഖ്യമന്ത്രി ഉദ്യോഗസ്ഥർക്ക് കർശന നിർദ്ദേശം നൽകി. മുൻപ് ഡിഎംകെ ഭരണകാലത്ത് ഇത്തരത്തിൽ കോടിക്കണക്കിന് രൂപ പാർട്ടി ഫണ്ടുകളിലേക്ക് വകമാറ്റിയിട്ടുണ്ടോ എന്നതിനെക്കുറിച്ച് അടിയന്തര അന്വേഷണം പ്രഖ്യാപിക്കാനാണ് പുതിയ ടിവികെ സർക്കാരിന്റെ തീരുമാനം.
ഒരു കേയ്സ് മദ്യത്തിന് 90 രൂപ, ഒരു കേയ്സ് ബിയറിന് 40 രൂപ, ഒരു കേയ്സ് വൈനിന് 20 രൂപ എന്നിങ്ങനെ വിവിധ മന്ത്രിമാരുടെയും രാഷ്ട്രീയ പാർട്ടികളുടെയും ഫണ്ടുകളിലേക്ക് വകമാറ്റുന്ന അനധികൃത പിരിവ് രീതി സംസ്ഥാനത്ത് നിലവിലുണ്ടായിരുന്നതായി ഉദ്യോഗസ്ഥർ മുഖ്യമന്ത്രിയെ ധരിപ്പിച്ചിരുന്നു. ടാസ്മാക് വഴി ഇത്തരത്തിൽ പ്രതിമാസം 102 കോടിയോളം രൂപയാണ് വകമാറ്റിയിരുന്നത്. കഴിഞ്ഞ അഞ്ച് വർഷത്തെ ഭരണത്തിനിടയിൽ ഏകദേശം 1,600 കോടി രൂപയെങ്കിലും ഇതിലൂടെ തമിഴ്നാട് സംസ്ഥാന ഖജനാവിന് നഷ്ടപ്പെട്ടിട്ടുണ്ടാകാമെന്നാണ് പ്രാഥമിക കണക്കുകൾ സൂചിപ്പിക്കുന്നത്. ഇനി മുതൽ ഇത്തരം നിയമവിരുദ്ധമായ ഹോൾസെയിൽ-റീട്ടെയ്ൽ പണപ്പിരിവ് സംവിധാനങ്ങൾ അനുവദിക്കില്ലെന്ന് വ്യക്തമാക്കിയ മുഖ്യമന്ത്രി, ഉദ്യോഗസ്ഥർക്ക് ജാഗ്രതാ നിർദ്ദേശം നൽകി. ടിവികെ സർക്കാർ അധികാരമേറ്റയുടൻ ആരാധനാലയങ്ങൾ, സ്കൂളുകൾ, ബസ് സ്റ്റാൻഡുകൾ എന്നിവയുടെ 500 മീറ്റർ പരിധിയിലുള്ള 717 ടാസ്മാക് റീട്ടെയ്ൽ മദ്യഷാപ്പുകൾ പൂട്ടാൻ ഉത്തരവിട്ടത് വലിയ ജനപ്രീതി നേടിയിരുന്നു.
Summary: Tamil Nadu Chief Minister Joseph Vijay has taken a stringent stance against illegal party fund collections through the Tamil Nadu State Marketing Corporation (TASMAC). Officers informed the Chief Minister that approximately ₹102 crore was being diverted monthly to political funds by collecting illegal margins on liquor cases, leading to an estimated loss of ₹1,600 crore to the state exchequer over the past five years. Terming this unacceptable, Vijay ordered officials to eradicate this bribery network completely and announced an imminent investigation into the misuse of TASMAC during the previous DMK regime.
