ന്യൂഡൽഹി: ബോളിവുഡ് പിന്നണി ഗാനരംഗത്ത് നിന്ന് വിരമിക്കൽ പ്രഖ്യാപിച്ച അർജിത് സിംഗിന്റെ തീരുമാനത്തെ പിന്തുണച്ച് പ്രിയ ഗായിക ശ്രേയ ഘോഷാൽ. അർജിതിനെപ്പോലെ തനിക്കും സംഗീതത്തിൽ നിന്ന് ഒരു ഇടവേള എടുക്കാൻ തോന്നാറുണ്ടെന്ന് ശ്രേയ തുറന്നുപറഞ്ഞു (Shreya Ghoshal Break From Playback Singing). എബിപി ന്യൂസിന് നൽകിയ അഭിമുഖത്തിലാണ് ഗായിക തന്റെ മനസ്സ് തുറന്നത്.
“അർജിത് വളരെ ധീരമായ ഒരു തീരുമാനമാണ് എടുത്തത്. അദ്ദേഹത്തിന്റെ ഉള്ളിൽ ഒരു തികഞ്ഞ സംഗീതജ്ഞനുണ്ട്. എന്തിനാണ് താൻ സംഗീതം സൃഷ്ടിക്കുന്നതെന്നോ അതിൽ നിന്ന് എന്ത് ലഭിക്കുമെന്നോ അദ്ദേഹം ചിന്തിക്കാറില്ല. തനിക്ക് സന്തോഷം നൽകുന്ന കാര്യങ്ങൾ മാത്രമാണ് അദ്ദേഹം ചെയ്യുന്നത്,” ശ്രേയ പറഞ്ഞു. ലൈവ് ഷോകളിൽ ലിപ്-സിങ്കിംഗ് ചെയ്യുന്നത് തനിക്ക് കടുത്ത അസ്വസ്ഥതയുണ്ടാക്കുന്ന കാര്യമാണെന്നും അത്തരമൊരു സാഹചര്യം വന്നാൽ താൻ പാടുന്നത് നിർത്തുമെന്നും ശ്രേയ കൂട്ടിച്ചേർത്തു.
ഈ വർഷം ജനുവരി 27-നാണ് താൻ ഇനി പുതിയ പിന്നണി ഗാനങ്ങൾ ഏറ്റെടുക്കില്ലെന്ന് അർജിത് സിംഗ് പ്രഖ്യാപിച്ചത്. ‘തുമ് ഹി ഹോ’, ‘കേസരിയ’, ‘ചന്ന മേരേയ’ തുടങ്ങി നൂറുകണക്കിന് ഹിറ്റ് ഗാനങ്ങളിലൂടെ ഇന്ത്യൻ സിനിമാ ലോകത്തെ അവിഭാജ്യ ഘടകമായിരുന്ന അർജിതിന്റെ പിന്മാറ്റം ആരാധകരെ ഞെട്ടിച്ചിരുന്നു. എന്നാൽ ഇത് ഒരു യുഗത്തിന്റെ അന്ത്യമല്ലെന്നും അർജിത് സിംഗ് എന്ന പ്രതിഭയുടെ പുതിയൊരു ഘട്ടത്തിന്റെ തുടക്കമാണെന്നുമാണ് ശ്രേയ ഘോഷാൽ അന്ന് പ്രതികരിച്ചത്. സായ് പല്ലവി, ജുനൈദ് ഖാൻ എന്നിവർ അഭിനയിക്കുന്ന ‘ഏക് ദിൻ’ എന്ന ചിത്രത്തിലെ ഗാനമായിരിക്കും അർജിതിന്റേതായി ഇനി പുറത്തുവരാനുള്ള പ്രധാന പ്രോജക്റ്റ്.
