ന്യൂഡൽഹി: ഇത്തവണത്തെ ട്വന്റി20 ലോകകപ്പിൽ അമേരിക്ക കാനഡ, ഒമാൻ തുടങ്ങിയ രാജ്യങ്ങൾക്കായി കളിക്കളത്തിലിറങ്ങിയ ഇന്ത്യൻ വംശജരായ ക്രിക്കറ്റ് താരങ്ങളെ അഭിനന്ദിച്ച് പ്രധാനമന്ത്രി നരേന്ദ്ര മോദി (PM Narendra Modi Mann Ki Baat). തന്റെ പ്രതിവാര റേഡിയോ പരിപാടിയായ ‘മൻ കി ബാത്തിന്റെ’ 131-ാം എപ്പിസോഡിലൂടെയാണ് അദ്ദേഹം താരങ്ങളെ പ്രശംസിച്ചത്. ലോകത്തിന്റെ ഏത് ഭാഗത്തായാലും ഇന്ത്യക്കാർ തങ്ങളുടെ കഠിനാധ്വാനത്തിലൂടെയും സ്വഭാവമഹിമയിലൂടെയും അവിടുത്തെ കായിക മേഖലയെ പരിപോഷിപ്പിക്കുന്നുവെന്ന് അദ്ദേഹം അഭിപ്രായപ്പെട്ടു.
കാനഡയുടെ ക്യാപ്റ്റൻ ദിൽപ്രീത് ബജ്വ, യുഎസ്എയുടെ മോനാങ്ക് പട്ടേൽ, ഒമാന്റെ ജതീന്ദർ സിംഗ് തുടങ്ങിയ പ്രമുഖ താരങ്ങളെ പ്രധാനമന്ത്രി തന്റെ പ്രസംഗത്തിൽ എടുത്തുപറഞ്ഞു. ഇന്ത്യയുടെ ആഭ്യന്തര ക്രിക്കറ്റിൽ നിന്ന് വളർന്നുവന്ന താരങ്ങൾ ഇന്ന് വിവിധ രാജ്യങ്ങളുടെ ക്യാപ്റ്റന്മാരായി ശോഭിക്കുന്നത് രാജ്യത്തിന് വലിയ അഭിമാനമാണെന്ന് അദ്ദേഹം വ്യക്തമാക്കി. തങ്ങളുടെ സാംസ്കാരിക പൈതൃകത്തോട് ചേർന്നുനിൽക്കുമ്പോൾ തന്നെ, പ്രതിനിധീകരിക്കുന്ന രാജ്യങ്ങൾക്കായി ആത്മാർത്ഥമായി പോരാടുന്നത് പുതിയ തലമുറയ്ക്ക് വലിയ മാതൃകയാണെന്നും അദ്ദേഹം കൂട്ടിച്ചേർത്തു.
ലോകകപ്പ് പോരാട്ടത്തിൽ പല നിർണ്ണായക മത്സരങ്ങളിലും ഈ താരങ്ങൾ കാഴ്ചവെച്ച മികച്ച പ്രകടനം ക്രിക്കറ്റ് ലോകം ശ്രദ്ധിച്ചിരുന്നു. ഇന്ത്യയിലെ തമിഴ്നാട്, ഗുജറാത്ത്, പഞ്ചാബ് തുടങ്ങിയ സംസ്ഥാനങ്ങളിൽ നിന്ന് വിദേശത്തേക്ക് കുടിയേറിയവരാണ് ഇവരിൽ പലരും. ലോകത്തെവിടെയായാലും ഭാരതീയർ കായികരംഗത്ത് വലിയ മാറ്റങ്ങൾ കൊണ്ടുവരുന്നു എന്നതിന്റെ തെളിവാണ് ഇവരുടെ നേട്ടമെന്ന് പ്രധാനമന്ത്രി പറഞ്ഞു.
