ന്യൂഡൽഹി: ഇറാനിലെ ഇസ്രായേൽ-അമേരിക്കൻ ആക്രമണങ്ങൾക്ക് പിന്നാലെ ഇന്ത്യയിലും അക്രമസാധ്യതയുണ്ടെന്ന് കേന്ദ്ര ആഭ്യന്തര മന്ത്രാലയം സംസ്ഥാനങ്ങൾക്ക് മുന്നറിയിപ്പ് നൽകി (MHA Warns States Pro Iran Radical Preachers). വിദേശത്തെ യുദ്ധസാഹചര്യങ്ങൾ രാജ്യത്തിനുള്ളിൽ ക്രമസമാധാന പ്രശ്നങ്ങളുണ്ടാക്കാൻ സാധ്യതയുള്ളതിനാൽ അതീവ ജാഗ്രത പാലിക്കണമെന്ന് ഫെബ്രുവരി 28-ന് അയച്ച സർക്കുലറിൽ വ്യക്തമാക്കി. ഇറാൻ അനുകൂല തീവ്ര പ്രഭാഷകരെയും പ്രകോപനപരമായ പ്രസംഗങ്ങൾ നടത്തുന്നവരെയും തിരിച്ചറിയാനും നിരീക്ഷിക്കാനും സുരക്ഷാ ഏജൻസികൾക്ക് നിർദ്ദേശം നൽകിയിട്ടുണ്ട്.
പശ്ചിമേഷ്യയിലെ സംഘർഷങ്ങൾ ഇന്ത്യൻ സമൂഹത്തിൽ ആഘാതമുണ്ടാക്കാതിരിക്കാൻ ഇന്റലിജൻസ് സംവിധാനങ്ങൾ ശക്തിപ്പെടുത്താൻ കേന്ദ്രം ആവശ്യപ്പെട്ടു. ഇതിനിടെ, പ്രധാനമന്ത്രി നരേന്ദ്ര മോദി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവുമായി ഫോണിൽ സംസാരിക്കുകയും യുദ്ധം ഉടനടി അവസാനിപ്പിക്കാൻ ആവശ്യപ്പെടുകയും ചെയ്തു. പശ്ചിമേഷ്യയിലെ സാഹചര്യം വിലയിരുത്താൻ പ്രധാനമന്ത്രിയുടെ അധ്യക്ഷതയിൽ ചേർന്ന സുരക്ഷാ കാര്യങ്ങൾക്കുള്ള കാബിനറ്റ് കമ്മിറ്റി (CCS), ഗൾഫ് രാജ്യങ്ങളിലുള്ള ദശലക്ഷക്കണക്കിന് ഇന്ത്യൻ പ്രവാസികളുടെ സുരക്ഷയിൽ ആശങ്ക രേഖപ്പെടുത്തി.
ഇറാൻ പരമോന്നത നേതാവ് ഖമേനിയുടെ വധത്തിന് പിന്നാലെ ദുബായ്, ദോഹ, കുവൈത്ത് എന്നിവിടങ്ങളിൽ സ്ഫോടനങ്ങൾ തുടരുന്നത് മലയാളി പ്രവാസികളെ വലിയ പ്രതിസന്ധിയിലാക്കിയിട്ടുണ്ട്. അഫ്ഗാൻ താലിബാൻ പാകിസ്താനിലെ വ്യോമതാവളം ആക്രമിച്ചതും പശ്ചിമേഷ്യയെ പൂർണ്ണമായ അസ്ഥിരതയിലേക്ക് നയിച്ചു. ഗൾഫിൽ കുടുങ്ങിക്കിടക്കുന്ന ഇന്ത്യൻ വിദ്യാർത്ഥികൾക്കും യാത്രക്കാർക്കും ആവശ്യമായ സഹായങ്ങൾ നൽകാൻ ബന്ധപ്പെട്ട വകുപ്പുകൾക്ക് സിസിഎസ് നിർദ്ദേശം നൽകി. രാജ്യാന്തര തലത്തിൽ സമാധാനം പുനഃസ്ഥാപിക്കാൻ ചർച്ചകളും നയതന്ത്ര നീക്കങ്ങളും മാത്രമേ വഴിയുള്ളൂ എന്ന് ഇന്ത്യ ആവർത്തിച്ചു.
