ന്യൂഡൽഹി: ഇന്ത്യൻ വ്യോമസേനയുടെ യുദ്ധവിമാനങ്ങളുടെ കുറവ് പരിഹരിക്കുന്നതിനായി 114 റഫാൽ യുദ്ധവിമാനങ്ങൾ വാങ്ങാനുള്ള നിർണ്ണായക നീക്കവുമായി കേന്ദ്ര പ്രതിരോധ മന്ത്രാലയം (India 114 Rafale jet deal MRFA). ഏകദേശം 3.25 ലക്ഷം കോടി രൂപ (36 ബില്യൺ ഡോളർ) ചെലവ് പ്രതീക്ഷിക്കുന്ന ഈ കരാറിന് ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ ഇന്ത്യാ സന്ദർശനത്തിന് മുന്നോടിയായി ഈ ആഴ്ച തന്നെ അംഗീകാരം ലഭിച്ചേക്കും. പ്രതിരോധ മന്ത്രി രാജ്നാഥ് സിംഗിന്റെ അധ്യക്ഷതയിലുള്ള ഡിഫൻസ് അക്വിസിഷൻ കൗൺസിൽ ഈ വ്യാഴാഴ്ച (ഫെബ്രുവരി 12) ചേർന്ന് കരാറിന് പ്രാഥമിക അനുമതി നൽകുമെന്നാണ് റിപ്പോർട്ടുകൾ സൂചിപ്പിക്കുന്നത്.
വ്യോമസേനയുടെ കരുത്ത് വർദ്ധിപ്പിക്കുന്നതിനൊപ്പം ‘മേയ്ക്ക് ഇൻ ഇന്ത്യ’ പദ്ധതിക്ക് വലിയ ഊന്നൽ നൽകുന്നതാണ് ഈ കരാർ. വാങ്ങുന്ന 114 വിമാനങ്ങളിൽ ഏകദേശം 100 എണ്ണവും ഇന്ത്യയിൽ തന്നെ നിർമ്മിക്കാനാണ് പദ്ധതി. ഇതിനായി ഫ്രഞ്ച് കമ്പനിയായ ദസ്സാൾട്ട് ഏവിയേഷൻ, ടാറ്റ അഡ്വാൻസ്ഡ് സിസ്റ്റംസുമായി സഹകരിക്കും. ഹൈദരാബാദിലെ പുതിയ പ്ലാന്റിൽ 2028 മുതൽ വിമാനത്തിന്റെ ഭാഗങ്ങൾ നിർമ്മിച്ച് തുടങ്ങും. അത്യാധുനിക യുദ്ധവിമാന സാങ്കേതികവിദ്യയുടെ കൈമാറ്റവും ഈ കരാറിന്റെ ഭാഗമാണ്. എങ്കിലും വിമാനത്തിന്റെ സോഴ്സ് കോഡുകൾ കൈമാറുന്ന കാര്യത്തിൽ ഇപ്പോഴും ചർച്ചകൾ തുടരുകയാണ്.
നിലവിൽ ഇന്ത്യൻ വ്യോമസേനയുടെ പക്കൽ 36 റഫാൽ വിമാനങ്ങളുണ്ട്. ഇതിനുപുറമെ നാവികസേനയ്ക്കായി 26 ‘റഫാൽ-എം’ (Rafale-M) വിമാനങ്ങൾ വാങ്ങാൻ 63,000 കോടി രൂപയുടെ കരാറിൽ കഴിഞ്ഞ വർഷം ഭാരതം ഒപ്പിട്ടിരുന്നു. പുതിയ 114 വിമാനങ്ങൾ കൂടി എത്തുന്നതോടെ ഇന്ത്യയുടെ മൊത്തം റഫാൽ വിമാനങ്ങളുടെ എണ്ണം 176 ആയി ഉയരും. പാകിസ്ഥാൻ, ചൈന അതിർത്തികളിലെ വെല്ലുവിളികൾ നേരിടാൻ ഇന്ത്യയെ പ്രാപ്തമാക്കുന്ന ഈ വിമാനങ്ങൾ മീറ്റിയോർ , സ്കാൽപ് തുടങ്ങിയ അതിമാരകമായ മിസൈലുകൾ വഹിക്കാൻ ശേഷിയുള്ളവയാണ്. കഴിഞ്ഞ വർഷം പാഹൽഗാം ഭീകരാക്രമണത്തിന് മറുപടിയായി ഇന്ത്യ നടത്തിയ ‘ഓപ്പറേഷൻ സിന്ദൂർ’ ദൗത്യത്തിലും റഫാൽ വിമാനങ്ങൾ നിർണ്ണായക പങ്കുവഹിച്ചിരുന്നു.
Summary: India is set to clear its biggest-ever defense deal worth Rs 3.25 lakh crore to procure 114 Rafale fighter jets for the Air Force. The proposal, likely to be approved by the Defence Acquisition Council this week ahead of French President Macron’s visit, includes plans to manufacture approximately 100 jets in India through a Tata-Dassault partnership. This acquisition aims to bridge the critical gap in IAF’s squadron strength while significantly boosting domestic aerospace manufacturing.
