വിവാഹയാത്ര അവിസ്മരണീയമാക്കാൻ ട്രെയിൻ കോച്ച് മുഴുവനായി ബുക്ക് ചെയ്ത് ആഘോഷം നടത്തുന്ന ഒരു ഇന്ത്യൻ കുടുംബത്തിന്റെ വീഡിയോ സോഷ്യൽ മീഡിയയിൽ വൈറലാകുന്നു. ട്രെയിൻ ഒരു ‘ചലിക്കുന്ന കല്യാണവീടായി’ മാറുന്ന കാഴ്ചയാണ് ദൃശ്യങ്ങളിലുള്ളത് (Family Books Entire Train Coach). കോച്ചിന്റെ നെയിംപ്ലേറ്റിൽ പൂമാലകൾ ചാർത്തിയും അതിഥികളെ സ്വാഗതം ചെയ്തുകൊണ്ടുള്ള പോസ്റ്ററുകൾ പതിപ്പിച്ചുമാണ് ആഘോഷങ്ങൾ തുടങ്ങിയത്. കുട്ടികൾ മുതൽ മുതിർന്നവർ വരെ പാട്ടിനൊപ്പം നൃത്തം ചെയ്യുന്നതും വധു കേക്ക് മുറിക്കുന്നതുമെല്ലാം വീഡിയോയിൽ കാണാം.
മാതൃബന്ധുക്കൾ വധുവിന്റെ കുടുംബത്തിന് സമ്മാനങ്ങൾ നൽകുന്ന ‘മെയ്റ’ അല്ലെങ്കിൽ ‘ഭാട്ട്’ എന്ന ആചാരത്തിന്റെ ഭാഗമായുള്ള പുതപ്പുകളും പെട്ടികളും കോച്ചിനുള്ളിൽ നിരത്തിയിട്ടുണ്ട്. ഇതിനിടയിലൂടെ ടിക്കറ്റ് പരിശോധനയ്ക്കായി എത്തുന്ന ഉദ്യോഗസ്ഥൻ ഈ ബഹളങ്ങൾക്കിടയിലും പുഞ്ചിരിയോടെ തന്റെ ജോലി ചെയ്യുന്നതും ദൃശ്യങ്ങളിലുണ്ട്. ഒരു മാർവാറി കുടുംബത്തിന്റെ വിവാഹ ആഘോഷമാണിതെന്ന കുറിപ്പോടെയാണ് വീഡിയോ പങ്കുവെച്ചിരിക്കുന്നത്.
ഈ വീഡിയോ ഇന്റർനെറ്റിൽ സമ്മിശ്ര പ്രതികരണങ്ങളാണ് ഉണ്ടാക്കിയിരിക്കുന്നത്. കുടുംബത്തിന്റെ ഒത്തൊരുമയെയും ആഘോഷത്തിലെ ഊർജ്ജത്തെയും പലരും പ്രശംസിച്ചു. ഇന്ത്യൻ സംസ്കാരത്തിന്റെ മനോഹരമായ കാഴ്ചയാണിതെന്നും കുറഞ്ഞ ചിലവിൽ എല്ലാവർക്കും ഒന്നിച്ച് യാത്ര ചെയ്യാൻ ഇത് സഹായിക്കുമെന്നും ചിലർ അഭിപ്രായപ്പെട്ടു. എന്നാൽ, പൊതുഗതാഗത സംവിധാനത്തിൽ ഇത്രയും ബഹളം വെച്ച് ആഘോഷിക്കുന്നത് ശരിയാണോ എന്ന് ചോദിച്ച് ഒരു വിഭാഗം വിമർശനവും ഉന്നയിക്കുന്നുണ്ട്.
അതേസമയം, ഇന്ത്യൻ റെയിൽവേയിൽ കോച്ചുകളോ ട്രെയിൻ മുഴുവനായോ ബുക്ക് ചെയ്യുന്നത് നിയമവിരുദ്ധമല്ല. ഐആർസിടിസിയുടെ ‘ഫുൾ ടാരിഫ് റേറ്റ്’ സംവിധാനം വഴി ഓൺലൈനായോ പ്രധാന സ്റ്റേഷനുകൾ വഴിയോ ആർക്കും കോച്ചുകൾ ബുക്ക് ചെയ്യാം. യാത്രയ്ക്ക് ആറ് മാസം മുമ്പ് വരെ അപേക്ഷിക്കാവുന്ന ഈ സംവിധാനത്തിന് ഒരു കോച്ചിന് ഏകദേശം 50,000 രൂപ സെക്യൂരിറ്റി ഡിപ്പോസിറ്റായി നൽകേണ്ടതുണ്ട്.
When a Marwari wedding party books a railway coach! #IndianRailways #marriage pic.twitter.com/Yf52D2cISk
— Ananth Rupanagudi (@Ananth_IRAS) April 4, 2026
