മുംബൈ: ജയിലിൽ കഴിയുന്ന കാലയളവിൽ ഉപന്യാസ രചനയിലും പുസ്തക അവലോകനത്തിലും മികവ് തെളിയിച്ച പ്രതിയുടെ ശിക്ഷാ കാലാവധിയിൽ ഇളവ് നൽകി ബോംബെ ഹൈക്കോടതി (Bombay High Court POCSO sentence reduction). അഞ്ചുവയസ്സുകാരിയെ ലൈംഗികമായി പീഡിപ്പിച്ച കേസിൽ ശിക്ഷിക്കപ്പെട്ട പ്രതിയുടെ ജീവപര്യന്തം തടവാണ് കോടതി 12 വർഷമായി കുറച്ചത്. ജയിലിൽ വെച്ച് ഗാന്ധിദർശനങ്ങളെക്കുറിച്ചുള്ള പഠനത്തിലും മറ്റ് സാഹിത്യ പ്രവർത്തനങ്ങളിലും പ്രതി പങ്കെടുത്തതും ഇതിനുള്ള സർട്ടിഫിക്കറ്റുകൾ നേടിയതും കണക്കിലെടുത്താണ് കോടതിയുടെ ഈ നീക്കം. ജസ്റ്റിസ് സാരംഗ് കോട്വാൾ, ജസ്റ്റിസ് സന്ദേഷ് പാട്ടീൽ എന്നിവരടങ്ങിയ ഡിവിഷൻ ബെഞ്ചാണ് വിധി പുറപ്പെടുവിച്ചത്.
2016 ഡിസംബറിലാണ് ഘാട്ട്കോപ്പറിലെ ചൗളിൽ താമസിക്കുന്ന 20 വയസ്സുകാരനായ പ്രതി അയൽവാസിയുടെ അഞ്ചുവയസ്സുകാരിയായ മകളെ ക്രൂരമായി പീഡിപ്പിച്ചത്. 2020-ൽ പ്രത്യേക പോക്സോ കോടതി ഇയാൾക്ക് ജീവപര്യന്തം തടവ് വിധിച്ചിരുന്നു. എന്നാൽ പ്രതിയുടെ പ്രായവും ജയിലിലെ സ്വഭാവരീതികളും പരിഗണിച്ച് ശിക്ഷയിൽ ഇളവ് നൽകണമെന്ന് പ്രതിഭാഗം അഭിഭാഷകർ വാദിച്ചു. ജയിലിൽ വെച്ച് പൂനെ തിലക് മഹാരാഷ്ട്ര സർവ്വകലാശാലയുടെ പുസ്തക അവലോകന പരിപാടിയിലും മുംബൈ സർവോദയ മണ്ഡലിന്റെ ഗാന്ധിദർശന പരീക്ഷയിലും ഇയാൾ വിജയിച്ചിരുന്നു. ഇതിന്റെ സർട്ടിഫിക്കറ്റുകൾ കോടതിയിൽ ഹാജരാക്കി.
പ്രതി ചെയ്ത കുറ്റത്തിന്റെ ഗൗരവം വലുതാണെങ്കിലും ജയിലിലെ ഇയാളുടെ മാറ്റം അവഗണിക്കാനാവില്ലെന്ന് കോടതി നിരീക്ഷിച്ചു. കുറ്റം ചെയ്യുമ്പോൾ പ്രതിക്ക് ക്രിമിനൽ പശ്ചാത്തലം ഉണ്ടായിരുന്നില്ലെന്നും കോവിഡ് കാലത്ത് പോലും ഇയാൾക്ക് ജാമ്യം ലഭിച്ചിരുന്നില്ലെന്നും കോടതി ചൂണ്ടിക്കാട്ടി. ഈ ഘടകങ്ങളെല്ലാം മുൻനിർത്തിയാണ് ശിക്ഷ 12 വർഷമാക്കി കുറച്ചത്. ഇതിൽ ഒമ്പത് വർഷത്തോളം പ്രതി ഇതിനോടകം തന്നെ ജയിലിൽ അനുഭവിച്ചു കഴിഞ്ഞു. നിയമപരമായ ശിക്ഷാ കാലാവധി പൂർത്തിയാക്കി സമൂഹത്തിലേക്ക് മടങ്ങാൻ പ്രതിക്ക് ലഭിക്കുന്ന അവസരമാണിതെന്ന് കോടതി നിരീക്ഷിച്ചു.
Summary: The Bombay High Court has reduced the life imprisonment of a POCSO convict to 12 years after considering his reformative activities in jail. The court noted that the 20-year-old (at the time of the 2016 crime) had earned certificates in essay writing and studying Mahatma Gandhi’s thoughts during his nine years of incarceration. While upholding the conviction for assaulting a 5-year-old, the bench exercised leniency based on his academic progress and lack of prior criminal history.
