ദിസ്പൂർ: അസം നിയമസഭാ തിരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെ ഭരണകക്ഷിയായ ബിജെപിക്ക് വൻ തിരിച്ചടി. സംസ്ഥാന കായിക മന്ത്രി നന്ദിത ഗർലോസ ബിജെപി വിട്ട് കോൺഗ്രസിൽ ചേർന്നു. വരാനിരിക്കുന്ന തിരഞ്ഞെടുപ്പിൽ ബിജെപി സീറ്റ് നിഷേധിച്ചതിനെത്തുടർന്നാണ് നന്ദിതയുടെ പാർട്ടി മാറ്റം.(BJP minister joins Congress day before Assam nomination deadline;, to contest from Halflong)
ഹാഫ് ലോങ് മണ്ഡലത്തിൽ കോൺഗ്രസ് സ്ഥാനാർത്ഥിയായി നന്ദിത ഗർലോസ മത്സരിക്കും. ഇവിടെ നേരത്തെ പ്രഖ്യാപിച്ചിരുന്ന സ്ഥാനാർത്ഥിയെ മാറ്റിയാണ് നന്ദിതയ്ക്ക് അവസരം നൽകാൻ കോൺഗ്രസ് തീരുമാനിച്ചത്. നന്ദിത ഗർലോസ പാർട്ടിയിൽ ചേർന്ന വിവരം കോൺഗ്രസ് ഔദ്യോഗികമായി സ്ഥിരീകരിച്ചു.
ഹാഫ് ലോങ്ങിലെ സ്ഥാനാർത്ഥിയായി നന്ദിതയെ നാളെ ഔദ്യോഗികമായി പ്രഖ്യാപിക്കുമെന്ന് കോൺഗ്രസ് പ്രസ്താവനയിലൂടെ അറിയിച്ചു. ഇതിനായുള്ള നടപടിക്രമങ്ങൾ വേഗത്തിൽ പൂർത്തിയാക്കുമെന്നും പാർട്ടി നേതൃത്വം വ്യക്തമാക്കി. അസമിലെ 126 മണ്ഡലങ്ങളിലേക്കുള്ള നിയമസഭാ തിരഞ്ഞെടുപ്പ് ഏപ്രിൽ 9-നാണ് നടക്കുന്നത്.
