ന്യൂഡൽഹി: മഹാരാഷ്ട്ര ഉപമുഖ്യമന്ത്രിയും എൻസിപി അധ്യക്ഷനുമായിരുന്ന അജിത് പവാറിന്റെ വിമാനാപകടത്തിലെ മരണത്തിൽ ദുരൂഹതയുണ്ടെന്ന് ശിവസേന(യുബിടി)യും കോൺഗ്രസും. ബാരാമതിക്ക് സമീപം ഉണ്ടായ അപകടത്തിൽ അജിത് പവാർ കൊല്ലപ്പെട്ടതിന് പിന്നിൽ ഗൂഢാലോചനയുണ്ടെന്നാണ് ഇവർ ആരോപിക്കുന്നത്. രണ്ട് എൻസിപി വിഭാഗങ്ങളും തമ്മിലുള്ള ലയന ചർച്ചകൾ സജീവമായ ഘട്ടത്തിലാണ് ഈ അപകടം നടന്നതെന്നത് സംശയം വർദ്ധിപ്പിക്കുന്നുവെന്ന് ഇവർ ചൂണ്ടിക്കാട്ടുന്നു.(Ajit Pawar’s death, Opposition alleges conspiracy)
ശിവസേന എംപി സഞ്ജയ് റാവുത്ത് സംഭവത്തിൽ പാർലമെന്റ് തലത്തിലുള്ള അന്വേഷണം ആവശ്യപ്പെട്ടു. എൻഡിഎ സഖ്യം വിടാൻ അജിത് പവാർ തീരുമാനിച്ചിരുന്നുവെന്നും ബിജെപി നേതാക്കൾക്കെതിരെയുള്ള നിർണ്ണായക ഫയലുകൾ അദ്ദേഹത്തിന്റെ കൈവശമുണ്ടായിരുന്നുവെന്നും റാവുത്ത് അവകാശപ്പെട്ടു.
തിരശ്ശീലയ്ക്ക് പിന്നിൽ എന്തോ സംഭവിച്ചിട്ടുണ്ട്. അജിത് പവാർ പഴയ സഖ്യത്തിലേക്ക് മടങ്ങാൻ തയ്യാറെടുക്കുമ്പോഴാണ് വീണ്ടും അഴിമതിയാരോപണങ്ങൾ ഉയർന്നതും തൊട്ടുപിന്നാലെ ഈ അപകടം നടന്നതും, റാവുത്ത് ആരോപിച്ചു. അജിത് പവാറിന്റെ മരണത്തിന് പിന്നാലെ ഉപമുഖ്യമന്ത്രി പദം തിടുക്കത്തിൽ നികത്തിയതിനെ കോൺഗ്രസ് നേതാവ് വിജയ് വഡേട്ടിവാർ ചോദ്യം ചെയ്തു.
രണ്ട് എൻസിപി വിഭാഗങ്ങൾ ഒന്നിക്കുന്നത് തടയാൻ എവിടെയോ ആസൂത്രിതമായ പദ്ധതികൾ നടന്നിട്ടുണ്ട്. ഇതൊരു കേവല അപകടമല്ലെന്നും ഉന്നതതല അന്വേഷണം വേണമെന്നും അദ്ദേഹം ആവശ്യപ്പെട്ടു. പ്രതിപക്ഷ ആരോപണങ്ങളെ ലജ്ജാകരമെന്നാണ് ബിജെപി വിശേഷിപ്പിച്ചത്. മരണപ്പെട്ട വ്യക്തിയെച്ചൊല്ലി നിസ്സാരമായ രാഷ്ട്രീയം കളിക്കുന്നത് ശരിയല്ലെന്ന് ബിജെപി നേതാവ് ഉജ്ജ്വൽ നികം പ്രതികരിച്ചു.
