കോഴിക്കോട്: വരാനിരിക്കുന്ന നിയമസഭാ തിരഞ്ഞെടുപ്പിൽ ബേപ്പൂർ മണ്ഡലത്തിൽ പി.വി. അൻവർ മത്സരിക്കുമെന്ന വാർത്തകളോട് പ്രതികരിച്ച് മന്ത്രി പി.എ. മുഹമ്മദ് റിയാസ് (PV Anwar Candidacy Beypore). വോട്ടർ പട്ടികയിൽ പേരുള്ള ഏതൊരു പൗരനും തിരഞ്ഞെടുപ്പിൽ മത്സരിക്കാൻ അവകാശമുണ്ടെന്നും ആര് എവിടെ മത്സരിക്കണമെന്ന് തീരുമാനിക്കേണ്ടത് ആ അതാത് മുന്നണികളാണെന്നും അദ്ദേഹം പറഞ്ഞു. ബേപ്പൂരിൽ ആരെ നിർത്തണമെന്ന് യുഡിഎഫ് തീരുമാനിക്കട്ടെ എന്നും അദ്ദേഹം കൂട്ടിച്ചേർത്തു. കോഴിക്കോട് മാധ്യമപ്രവർത്തകരോട് സംസാരിക്കുകയായിരുന്നു മന്ത്രി.
തദ്ദേശ തിരഞ്ഞെടുപ്പിൽ ചിലയിടങ്ങളിൽ നേരിട്ട തിരിച്ചടികളെക്കുറിച്ചും റിയാസ് പരാമർശിച്ചു. പ്രാദേശികമായ ചില പ്രശ്നങ്ങളാണ് തദ്ദേശ തിരഞ്ഞെടുപ്പിലെ ഫലത്തെ ബാധിച്ചത്. നിലവിൽ നടക്കുന്ന ഗൃഹസന്ദർശന പരിപാടികളിലൂടെ ജനങ്ങളുടെ അഭിപ്രായങ്ങൾ നേരിട്ട് അറിയാൻ സാധിക്കുന്നുണ്ട്. ഭരണതലത്തിലും പാർട്ടി തലത്തിലും തിരുത്തേണ്ട കാര്യങ്ങൾ കൃത്യമായി തിരുത്തി മുന്നോട്ടുപോകുമെന്നും അദ്ദേഹം വ്യക്തമാക്കി.
സിപിഎം നേതാവ് എം.എ. ബേബി ഭക്ഷണം കഴിച്ച പാത്രം കഴുകുന്ന ചിത്രം സോഷ്യൽ മീഡിയയിൽ ട്രോളുകൾക്ക് ഇരയായതിനെക്കുറിച്ചും മന്ത്രി പ്രതികരിച്ചു. എം.എ. ബേബിയെ അടുത്തറിയുന്നവർക്ക് അത്ഭുതം തോന്നില്ലെന്നും അത് അദ്ദേഹത്തിന്റെ കാലങ്ങളായുള്ള ശീലമാണെന്നും റിയാസ് പറഞ്ഞു. സ്വന്തം പാത്രം പോലും കഴുകാത്തവർക്കാണ് ഇത് പിആർ വർക്ക് ആയി തോന്നുന്നത്. ഇത്തരം വ്യക്തിപരമായ ശീലങ്ങളെ രാഷ്ട്രീയ ലാഭത്തിനായി അധിക്ഷേപിക്കരുതെന്നും അദ്ദേഹം ആവശ്യപ്പെട്ടു.
Minister P.A. Muhammad Riyas reacted to rumors of P.V. Anwar contesting from the Beypore constituency in the 2026 assembly elections, stating that anyone on the voter list has the right to contest. He added that the UDF should decide on their candidates and that the LDF is focused on rectifying local issues identified during recent local body elections. Riyas also defended M.A. Baby against social media trolls, asserting that washing one's own plate is a long-standing habit of the leader and not a PR stunt.