തിരുവനന്തപുരം: കോൺഗ്രസ് സ്ഥാനാർത്ഥി നിർണ്ണയത്തിൽ കാലതാമസം ഉണ്ടായിട്ടില്ലെന്നും മാധ്യമങ്ങൾ വ്യാജവാർത്തകൾ ചമയ്ക്കുകയാണെന്നും പ്രതിപക്ഷ നേതാവ് വി.ഡി. സതീശൻ (VD Satheesan). ഡൽഹിയിലും കേരളത്തിലുമായി നടന്ന ദിവസങ്ങൾ നീണ്ട ചർച്ചകൾക്കൊടുവിൽ രണ്ടാംഘട്ട പട്ടിക പുറത്തിറങ്ങിയതിന് പിന്നാലെയാണ് നേതൃത്വത്തിന്റെ വിശദീകരണം. ഇത്തവണ 100 സീറ്റുകൾ നേടി യു.ഡി.എഫ് അധികരത്തിൽ തിരിച്ചെത്തുമെന്നും അദ്ദേഹം ആത്മവിശ്വാസം പ്രകടിപ്പിച്ചു.
ഒരു ദേശീയ പാർട്ടി എന്ന നിലയിൽ നിരവധി നടപടിക്രമങ്ങൾ പൂർത്തിയാക്കേണ്ടതുണ്ട്. അതുകൊണ്ടാണ് പ്രഖ്യാപനം രാത്രിയിലേക്ക് നീണ്ടതെന്ന് വി.ഡി. സതീശനും യു.ഡി.എഫ് കൺവീനറും വ്യക്തമാക്കി. ഏറ്റവും വേഗത്തിലുള്ള സ്ഥാനാർത്ഥി പ്രഖ്യാപനമാണ് ഇത്തവണ നടന്നതെന്നും നേതാക്കൾ അവകാശപ്പെട്ടു.
പെരുമ്പാവൂരിൽ സിറ്റിംഗ് എം.എൽ.എ എൽദോസ് കുന്നപ്പിള്ളിക്ക് സീറ്റ് നൽകാതിരുന്നത് വിവിധ ഘടകങ്ങൾ പരിശോധിച്ച ശേഷമാണെന്ന് സതീശൻ പറഞ്ഞു. പാർട്ടി താല്പര്യത്തിനാണ് മുൻഗണന നൽകിയത്. താൻ കോന്നിയിൽ മത്സരിക്കണമെന്ന് ജനങ്ങൾ ആഗ്രഹിച്ചിരുന്നുവെന്നും ഇക്കാര്യം നേതൃത്വത്തെ അറിയിച്ചിരുന്നുവെന്നും അടൂർ പ്രകാശ് എം.പി പറഞ്ഞു. എന്നാൽ എ.ഐ.സി.സിയുടെ തീരുമാനം പൂർണ്ണമായി അംഗീകരിക്കുന്നു. ഔദ്യോഗിക പട്ടിക വരാൻ വൈകിയതിനാലാണ് ഫേസ്ബുക്ക് പോസ്റ്റ് പിൻവലിച്ചതെന്നും അദ്ദേഹം കൂട്ടിച്ചേർത്തു.
പട്ടിക പുറത്തുവന്നതോടെ ഭൂരിഭാഗം സ്ഥാനാർത്ഥികളും നാളെത്തന്നെ (ശനിയാഴ്ച) വരണാധികാരികൾക്ക് മുൻപാകെ നാമനിർദ്ദേശ പത്രിക സമർപ്പിക്കും. പ്രചാരണ പ്രവർത്തനങ്ങളിൽ ഇനി ഒട്ടും സമയം കളയാനില്ലെന്ന നിലപാടിലാണ് യു.ഡി.എഫ് നേതൃത്വം.
Story Summary:
Opposition leader V.D. Satheesan dismissed reports of internal conflict within Congress regarding candidate selection, calling them media-driven fake news. He asserted that the UDF would return to power with 100 seats. Adoor Prakash MP clarified that while he considered contesting from Konni based on local demand, he respects the AICC’s final decision. Candidates are set to file their nominations on Saturday following the release of the final list.
