തിരുവനന്തപുരം: വാമനപുരം കണിച്ചോട് ഒരു വയസ്സുകാരി പവിത്രയെ വീടിനുള്ളിൽ മരിച്ചനിലയിൽ കണ്ടെത്തിയ സംഭവത്തിൽ ദുരൂഹതയേറുന്നു (Vamanapuram child death). കുഞ്ഞിന്റെ മാതാവ് അശ്വതിയെ പോലീസ് കസ്റ്റഡിയിലെടുത്ത് ചോദ്യം ചെയ്തുവരികയാണ്. വ്യാഴാഴ്ച വൈകുന്നേരമാണ് നാടിനെ നടുക്കിയ സംഭവം പുറംലോകമറിഞ്ഞത്.
സംഭവത്തെക്കുറിച്ച് പോലീസ് പറയുന്നത്:
അശ്വതിയുടെ മാതാവ് (കുഞ്ഞിന്റെ അമ്മൂമ്മ) തൊഴിലുറപ്പ് ജോലി കഴിഞ്ഞ് മടങ്ങിയെത്തിയപ്പോഴാണ് കിടപ്പുമുറിയിലെ പായയിൽ കുഞ്ഞിനെ അനക്കമില്ലാത്ത നിലയിൽ കണ്ടത്. കുഞ്ഞ് ഉറങ്ങുകയാണെന്നാണ് ആദ്യം കരുതിയത്. സംശയം തോന്നി കുഞ്ഞിനെ ഉണർത്താൻ ശ്രമിച്ചെങ്കിലും പ്രതികരണമുണ്ടായിരുന്നില്ല. ഉടൻ തന്നെ കാരേറ്റെ സ്വകാര്യ ആശുപത്രിയിൽ എത്തിച്ചെങ്കിലും അതിനോടകം മരണം സംഭവിച്ചിരുന്നു.
കുഞ്ഞിന്റെ കഴുത്തിൽ പാടുകളുള്ളതായി പ്രാഥമിക പരിശോധനയിൽ വ്യക്തമായിട്ടുണ്ട്. ഇതാണ് കൊലപാതകമാണെന്ന സംശയത്തിലേക്ക് പോലീസിനെ എത്തിച്ചത്. സംഭവസമയത്ത് കുഞ്ഞിനൊപ്പം മാതാവ് അശ്വതി മാത്രമാണ് വീട്ടിലുണ്ടായിരുന്നത്. നിലവിൽ അശ്വതിയെ പോലീസ് വിശദമായി ചോദ്യം ചെയ്തുവരികയാണ്. കുഞ്ഞിന്റെ മൃതദേഹം പോസ്റ്റ്മോർട്ടത്തിനായി മെഡിക്കൽ കോളേജ് ആശുപത്രിയിലേക്ക് മാറ്റി. പോസ്റ്റ്മോർട്ടം റിപ്പോർട്ട് ലഭിച്ചാലുടൻ മരണകാരണം സംബന്ധിച്ച് അന്തിമ സ്ഥിരീകരണം ഉണ്ടാകുമെന്ന് വെഞ്ഞാറമൂട് പോലീസ് അറിയിച്ചു.
Story Summary: A one-year-old girl named Pavithra was found dead under mysterious circumstances at her home in Vamanapuram, Thiruvananthapuram. Police are questioning her mother, Aswathy, as marks were found on the child’s neck. The incident was discovered by the child’s grandmother.
