തിരുവനന്തപുരം: ക്രിക്കറ്റ് കോച്ചിംഗിനെത്തിയ പ്രായപൂർത്തിയാകാത്ത പെൺകുട്ടികളെ ഭീഷണിപ്പെടുത്തി ലൈംഗികമായി പീഡിപ്പിച്ച കേസിലെ പ്രതിയായ പരിശീലകന് കോടതി വീണ്ടും 47 വർഷം കഠിനതടവും 79,000 രൂപ പിഴയും വിധിച്ചു (Thiruvananthapuram cricket coach POCSO case). തിരുവനന്തപുരം ശ്രീവരാഹം സ്വദേശിയായ കോച്ച് എം. മനുവിനെതിരെ രജിസ്റ്റർ ചെയ്ത ആറ് പോക്സോ കേസുകളിൽ മൂന്നാമത്തെ കേസിലാണ് തിരുവനന്തപുരം അതിവേഗ പ്രത്യേക കോടതി (Special Pocso Court) ഇപ്പോൾ കടുത്ത ശിക്ഷ വിധിച്ചിരിക്കുന്നത്. ഇതിന് പുറമെ വിചാരണ പൂർത്തിയായ നാലാമത്തെ കേസിൽ പ്രതി കുറ്റക്കാരനാണെന്ന് കോടതി കണ്ടെത്തുകയും ചെയ്തു. ഇതിൽ വരുന്ന തിങ്കളാഴ്ച കോടതി ശിക്ഷ പ്രഖ്യാപിക്കും.
പ്രതിയുടെ പേരിലുള്ള ആറ് കേസുകളിൽ രണ്ടാമത്തെ കേസിൽ കഴിഞ്ഞ ദിവസമാണ് കോടതി വിധി പ്രസ്താവിച്ചത്. അതിൽ 35 വർഷം കഠിനതടവും 66,000 രൂപ പിഴയുമാണ് കോടതി വിധിച്ചിരുന്നത്. ക്രിമിനൽ നടപടിച്ചട്ടം (CrPC) സെക്ഷൻ 427 പ്രകാരം പ്രതിയുടെ ഓരോ കേസുകളിലെയും ശിക്ഷാ കാലാവധി പൂർത്തിയാകുന്ന മുറയ്ക്ക് വേണം അടുത്ത കേസിലെ ശിക്ഷാ കാലാവധി ആരംഭിക്കാൻ എന്ന് പ്രോസിക്യൂഷൻ കോടതിയിൽ ശക്തമായി വാദിച്ചിരുന്നു. ഈ വാദം പൂർണ്ണമായി അംഗീകരിച്ച കോടതി, പ്രതി ഓരോ കേസിലെയും ശിക്ഷ ഒരുമിച്ച് അനുഭവിക്കാൻ പാടില്ലെന്നും, ആദ്യ കേസിലെ തടവ് കാലാവധി കഴിഞ്ഞ ശേഷം മാത്രമേ അടുത്ത കേസിലെ ശിക്ഷ ആരംഭിക്കാവൂ എന്നും പ്രത്യേകം ഉത്തരവിട്ടു. ഇതോടെ പ്രതി ജീവിതകാലം മുഴുവൻ ജയിലിനുള്ളിൽ കഴിയേണ്ടി വരും.
ക്രിക്കറ്റ് ഭാവി തകർക്കുമെന്ന് ഭീഷണി; പീഡനം പുറത്തറിഞ്ഞത് വർഷങ്ങൾക്ക് ശേഷം
കേസിനാസ്പദമായ സംഭവങ്ങൾ നടക്കുന്നത് 2018-ലാണ്. തിരുവനന്തപുരത്തെ പ്രമുഖ ക്രിക്കറ്റ് പരിശീലന കേന്ദ്രത്തിൽ കോച്ചിംഗിനായി എത്തിയ കുട്ടികളെയാണ് മനു ക്രൂരമായി ലൈംഗിക പീഡനത്തിന് ഇരയാക്കിയത്. കുട്ടികളെ പീഡിപ്പിച്ച ശേഷം ഇവരുടെ നഗ്നചിത്രങ്ങളും വീഡിയോകളും മൊബൈൽ ഫോണിൽ പകർത്തി സൂക്ഷിക്കുകയായിരുന്നു ഇയാളുടെ രീതി. പിന്നീട് തന്റെ ആഗ്രഹങ്ങൾക്ക് വഴങ്ങാതിരുന്ന കുട്ടികൾക്ക് ഇയാൾ ശരിയായ പരിശീലനം നൽകാതെ മാനസികമായി വേട്ടയാടി. പീഡനവിവരം പുറത്തുപറഞ്ഞാൽ പെൺകുട്ടികളുടെ ക്രിക്കറ്റ് ഭാവി തകർക്കുമെന്നായിരുന്നു ഇയാളുടെ പ്രധാന ഭീഷണി.
പ്രതിയെ ഭയന്ന് കുട്ടികൾ പിന്നീട് മറ്റ് സ്ഥലങ്ങളിലേക്ക് പരിശീലനത്തിനായി പോയെങ്കിലും കരിയർ ഓർത്ത് ആരും തന്നെ വിവരം പുറത്തുപറഞ്ഞിരുന്നില്ല. ഇത്തരത്തിൽ അഞ്ച് പെൺകുട്ടികളെയാണ് ഇയാൾ തുടർച്ചയായി പീഡിപ്പിച്ചത്. വർഷങ്ങൾക്ക് ശേഷം 2024-ൽ തിരുവനന്തപുരത്ത് വെച്ച് നടന്ന പെൺകുട്ടികളുടെ ഒരു ക്രിക്കറ്റ് ടൂർണമെന്റിനിടെയാണ് കേസിന് ആസ്പദമായ വഴിത്തിരിവുണ്ടാകുന്നത്. ടൂർണമെന്റിനെത്തിയ ഇരയായ ഒരു പെൺകുട്ടി വർഷങ്ങൾക്ക് ശേഷം പ്രതിയെ അപ്രതീക്ഷിതമായി അവിടെ വെച്ച് കാണുകയും ഭയന്ന് ബഹളം വെക്കുകയുമായിരുന്നു.
തുടർന്ന് അധികൃതർ ഇടപെട്ടതോടെയാണ് വർഷങ്ങളായി മൂടിവെക്കപ്പെട്ട ക്രൂരമായ പീഡനവിവരം പുറംലോകം അറിയുന്നത്. ഈ കുട്ടി ധൈര്യപൂർവ്വം പോലീസിൽ പരാതി നൽകിയതോടെയാണ് മറ്റ് പെൺകുട്ടികളും പരാതിയുമായി മുന്നോട്ട് വന്നത്. തുടർന്ന് പ്രതിക്കെതിരെ ആകെ ആറ് കേസുകൾ രജിസ്റ്റർ ചെയ്യുകയായിരുന്നു. ഇതിൽ കഴിഞ്ഞ മാസം വിധി വന്ന ഒന്നാമത്തെ കേസിൽ ഇതേ കോടതി പ്രതിയെ കഠിനതടവിന് ശിക്ഷിച്ചിരുന്നു. ബാക്കിയുള്ള മൂന്ന് കേസുകളിൽ കൂടി വരും ദിവസങ്ങളിൽ കോടതി വിധി പ്രസ്താവിക്കും.
Story Summary: A special POCSO court in Thiruvananthapuram sentenced cricket coach M. Manu to 47 years of rigorous imprisonment and a ₹79,000 fine in the third sexual assault case against him. The court ordered that the sentences for each of his 6 cases must be served consecutively under CrPC Section 427.
