തിരുവനന്തപുരം: തലസ്ഥാനത്തു നിന്നും നാഗർകോവിൽ വഴി ബെംഗളൂരുവിലേക്കുള്ള കെഎസ്ആർടിസിയുടെ പ്രീമിയം സർവീസായ ‘ഗജരാജ’ എസി സ്ലീപ്പർ ബസ് വീണ്ടും പ്രതിദിന സർവീസ് ആരംഭിച്ചു. അപകടത്തെത്തുടർന്ന് സർവീസ് ഒന്നിടവിട്ട ദിവസങ്ങളിലേക്ക് ചുരുക്കിയിരുന്നു. പുതിയ ബസ് എത്തിയതോടെയാണ് സർവീസ് പൂർണ്ണതോതിൽ പുനഃസ്ഥാപിച്ചത്.(Thiruvananthapuram – Bengaluru Gajaraja sleeper daily service of KSRTC resumed)
യാത്രക്കാർക്ക് ഏറെ സൗകര്യപ്രദമായ രീതിയിലാണ് ബസിന്റെ സമയക്രമവും റൂട്ടും നിശ്ചയിച്ചിരിക്കുന്നത്. കണിയാപുരത്ത് നിന്ന് വൈകിട്ട് 6:00-ന് പുറപ്പെടുന്ന ബസ് കഴക്കൂട്ടം, ടെക്നോപാർക്ക്, തമ്പാനൂർ, നെയ്യാറ്റിൻകര, പാറശാല, കളിയിക്കാവിള, നാഗർകോവിൽ, തിരുനൽവേലി, മധുര, കരൂർ, സേലം, ഹൊസൂർ വഴി പിറ്റേന്ന് രാവിലെ 8:30-ന് ബെംഗളൂരുവിൽ എത്തിച്ചേരും.
ബെംഗളൂരു സാറ്റലൈറ്റ് ടെർമിനലിൽ നിന്ന് എല്ലാ ദിവസവും വൈകിട്ട് 7:00-ന് പുറപ്പെടുന്ന ബസ് ഹൊസൂർ, സേലം, നാമക്കൽ, ദിണ്ഡിഗൽ, തിരുനെൽവേലി, നാഗർകോവിൽ, മാർത്താണ്ഡം, കളിയിക്കാവിള വഴി രാവിലെ 9:30-ന് കണിയാപുരത്ത് തിരിച്ചെത്തും. സർവീസ് പ്രതിദിനമായതോടെ ഓൺലൈൻ പോർട്ടലുകൾ വഴിയും കെഎസ്ആർടിസി കൗണ്ടറുകൾ വഴിയും ടിക്കറ്റുകൾ ലഭ്യമാണ്.
