പത്തനംതിട്ട: തദ്ദേശ സ്വയംഭരണ സ്ഥാപനങ്ങളിലേക്ക് തിരഞ്ഞെടുക്കപ്പെട്ട അംഗങ്ങളുടെ സത്യപ്രതിജ്ഞാ ചടങ്ങ് ഞായറാഴ്ച രാവിലെ നടത്താനുള്ള സർക്കാർ തീരുമാനം പുനഃപരിശോധിക്കണമെന്ന് നാഷണൽ ക്രിസ്ത്യൻ മൂവ്മെന്റ് ഫോർ ജസ്റ്റിസ്. ക്രിസ്തുമസ് കാലത്തെ ഞായറാഴ്ച വിശ്വാസികൾക്ക് ഏറെ പ്രാധാന്യമുള്ളതാണെന്നും ഈ തീരുമാനം ആരാധനാ സ്വാതന്ത്ര്യത്തിന്മേലുള്ള കടന്നുകയറ്റമാണെന്നും സംഘടന ആരോപിച്ചു.(Swearing-in ceremony on Sunday should be changed, NCMJ says it is obstructing freedom of worship)
ക്രൈസ്തവ വിശ്വാസികളെ സംബന്ധിച്ച് ഞായറാഴ്ച രാവിലെ പള്ളി ആരാധനകളിലും വിശുദ്ധ കുർബാനകളിലും പങ്കെടുക്കേണ്ട സമയമാണ്. സത്യപ്രതിജ്ഞ ഈ സമയത്ത് നിശ്ചയിക്കുന്നത് വിശ്വാസികളായ ജനപ്രതിനിധികൾക്ക് പ്രയാസമുണ്ടാക്കും. യേശുക്രിസ്തുവിന്റെ തിരുപ്പിറവി ആഘോഷിക്കുന്ന ക്രിസ്തുമസ് കാലത്തെ ഞായറാഴ്ചയ്ക്ക് സഭയിൽ വലിയ പ്രാധാന്യമുണ്ട്.
വിജയിച്ചവരിൽ പലരും ഇടവക ഭാരവാഹികളും സൺഡേ സ്കൂൾ അധ്യാപകരും ക്വയർ അംഗങ്ങളുമാണ്. ഇവർക്ക് പള്ളിയിലെ ചുമതലകളും സത്യപ്രതിജ്ഞയും ഒരേസമയം നിർവഹിക്കാനാവില്ല. ഈ വിഷയത്തിൽ സർക്കാർ സ്വീകരിക്കുന്ന നിലപാട് വരും ദിവസങ്ങളിൽ നിർണ്ണായകമാകും.