പത്തനംതിട്ട: അഞ്ചുവയസ്സുള്ള മകളെ കനാലിലെറിഞ്ഞ് കൊലപ്പെടുത്താൻ ശ്രമിച്ച പിതാവിനെ കൂടൽ പോലീസ് അറസ്റ്റ് ചെയ്തു (Pathanamthitta Crime News). കൂടൽ സ്വദേശി ഷിജു ആണ് പിടിയിലായത്. ഇന്നലെ വൈകുന്നേരമാണ് നാടിനെ നടുക്കിയ സംഭവം നടന്നത്. കുട്ടിയെ നാട്ടുകാർ സമയോചിതമായി ഇടപെട്ട് രക്ഷപ്പെടുത്തിയതിനാൽ വലിയൊരു ദുരന്തം ഒഴിവായി.
സംഭവത്തെക്കുറിച്ച് പോലീസ് പറയുന്നത് ഇങ്ങനെ …
ഷിജുവും ഭാര്യയും തമ്മിൽ വീട്ടിൽ വെച്ച് രൂക്ഷമായ തർക്കമുണ്ടായിരുന്നു. ഇതിനിടയിൽ “മകളെയും കൊണ്ട് മരിക്കാൻ പോവുകയാണ്” എന്ന് ആക്രോശിച്ചുകൊണ്ട് ഷിജു കുട്ടിയുമായി വീട്ടിൽ നിന്നിറങ്ങി. വീടിന് സമീപത്തുള്ള കനാലിന് അടുത്തെത്തിയ ഇയാൾ കുട്ടിയെ വെള്ളത്തിലേക്ക് വലിച്ചെറിയുകയായിരുന്നു. ഉടൻ തന്നെ ഓടിയെത്തിയ നാട്ടുകാർ കുട്ടിയെ സാഹസികമായി കരയ്ക്കെത്തിച്ചു.
കുട്ടിയുടെ അമ്മ നൽകിയ പരാതിയുടെ അടിസ്ഥാനത്തിൽ കൂടൽ പോലീസ് കേസെടുത്ത് പ്രതിയെ പിടികൂടി. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
കൂടൽ എസ്.എച്ച്.ഒ സുധീർ, എസ്.ഐ അനിൽ, സീനിയർ സി.പി.ഒമാരായ രാജേഷ്, സുനിൽ, സി.പി.ഒമാരായ ഫഹദ്, ഹരിദാസ് എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. ദമ്പതികളുടെ രണ്ടാം വിവാഹമാണിതെന്ന് പോലീസ് അറിയിച്ചു.
