കണ്ണൂർ: പാനൂർ മേഖലയിൽ വീണ്ടും സ്ഫോടനം. സെൻട്രൽ പൊയിലൂർ മേപ്പാട്ട് വീട് പുനർനിർമ്മാണത്തിനായി മണ്ണ് നീക്കുന്നതിനിടെയാണ് സ്റ്റീൽ ബോംബ് പൊട്ടിത്തെറിച്ചത്. വെള്ളിയാഴ്ച രാവിലെ ഒൻപതരയോടെ ഉണ്ടായ സ്ഫോടനത്തിൽ ടിപ്പർ ലോറി ഡ്രൈവർക്ക് പരിക്കേറ്റു.(Steel bomb explodes while clearing soil using JCB in Panoor)
മേപ്പാട്ടെ വീട്ടിക്കൽ അബ്ദുസലാമിന്റെ പറമ്പിൽ ജെ.സി.ബി ഉപയോഗിച്ച് കോൺക്രീറ്റ് വേസ്റ്റും മണ്ണും നീക്കം ചെയ്യുന്നതിനിടെയാണ് സ്ഫോടനമുണ്ടായത്. വടക്കേ പൊയിലൂർ സ്വദേശിയായ ടിപ്പർ ലോറി ഡ്രൈവർ സുമിത്ത് ലാലിനാണ് (25) പരിക്കേറ്റത്. ഇയാളെ ഉടൻ തന്നെ ആശുപത്രിയിൽ പ്രവേശിപ്പിച്ചു.
കൊളവല്ലൂർ പോലീസ് സ്ഥലത്തെത്തി പ്രാഥമിക പരിശോധന നടത്തി. മൺപൊത്തിനുള്ളിൽ ഒളിപ്പിച്ചുവെച്ച പഴയ ബോംബാകാം മണ്ണ് നീക്കുന്നതിനിടെ പൊട്ടിത്തെറിച്ചതെന്നാണ് പ്രാഥമിക നിഗമനം.
