സന്നിധാനം: ശബരിമല സ്വർണ്ണക്കവർച്ചാ കേസിലെ തെളിവുശേഖരണത്തിന്റെ ഭാഗമായി സന്നിധാനത്ത് റവന്യൂ സംഘം വിപുലമായ പരിശോധന നടത്തി. പ്രത്യേക അന്വേഷണ സംഘം (SIT) നൽകിയ മഹസർ പ്രകാരം ശ്രീകോവിൽ ഉൾപ്പെടെയുള്ള ഭാഗങ്ങളുടെ കൃത്യമായ അളവെടുപ്പാണ് സംഘം പൂർത്തിയാക്കിയത്.(Sabarimala gold theft case, Revenue team inspects Sannidhanam)
പെരുനാട് വില്ലേജ് ഓഫീസറുടെ നേതൃത്വത്തിലുള്ള പ്രത്യേക റവന്യൂ സംഘമാണ് സന്നിധാനത്തെത്തി പരിശോധന നടത്തിയത്. എസ്ഐടി നിർദ്ദേശിച്ചതനുസരിച്ച് സ്വർണ്ണവും മറ്റ് വിലപിടിപ്പുള്ള വസ്തുക്കളും കൈകാര്യം ചെയ്യുന്ന സ്ഥലങ്ങൾ, ശ്രീകോവിൽ പരിസരം എന്നിവ ശാസ്ത്രീയമായി അളന്നു തിട്ടപ്പെടുത്തി.
അളവെടുപ്പിന്റെ അടിസ്ഥാനത്തിൽ തയ്യാറാക്കുന്ന വിശദമായ 'സീൻ പ്ലാൻ' രണ്ട് ദിവസത്തിനകം എസ്ഐടിക്ക് കൈമാറുമെന്ന് റവന്യൂ അധികൃതർ അറിയിച്ചു. റവന്യൂ സംഘം തയ്യാറാക്കുന്ന ഈ സീൻ പ്ലാൻ അന്വേഷണത്തിൽ അതീവ നിർണ്ണായകമാണ്. ഇത് എസ്ഐടി നേരിട്ട് ഹൈക്കോടതിയിൽ സമർപ്പിക്കും.