പാലക്കാട്: കെടിഡിസി ചെയർമാൻ സ്ഥാനം ഒഴിഞ്ഞത് ആരുടെയും സമ്മർദ്ദം മൂലമല്ലെന്ന് പി.കെ. ശശി. സർക്കാരിനെയോ പാർട്ടിയെയോ സമ്മർദ്ദത്തിലാക്കാൻ താൻ ആഗ്രഹിക്കുന്നില്ലെന്നും സ്വമനസ്സാലെ എടുത്ത തീരുമാനമാണിതെന്നും അദ്ദേഹം വ്യക്തമാക്കി. ടൂറിസം മന്ത്രിക്കും വകുപ്പ് സെക്രട്ടറിക്കും ആണ് അദ്ദേഹം രാജിക്കത്ത് കൈമാറിയത്.(Resignation is not to put anyone under pressure, PK Sasi responds)
ആരുടെയും നിർദ്ദേശപ്രകാരമല്ല രാജി. വ്യക്തിപരമായ കാരണങ്ങൾ ചൂണ്ടിക്കാട്ടിയാണ് പടിയിറങ്ങുന്നത്. രാജി സർക്കാർ സ്വീകരിക്കുമെന്നാണ് പ്രതീക്ഷ. കെടിഡിസി ചെയർമാൻ സ്ഥാനത്ത് നിന്ന് മാത്രമാണ് രാജി വെച്ചത്. പാർട്ടി മെമ്പറായി തുടരുകയാണ്. പ്രവർത്തനങ്ങളിൽ സജീവമായിരിക്കുമെന്നും അദ്ദേഹം പറഞ്ഞു.
കഴിഞ്ഞ അഞ്ച് വർഷക്കാലം ഒരു ടീമായി പ്രവർത്തിച്ചതിന്റെ ഫലമായി കെടിഡിസി തുടർച്ചയായി രണ്ട് വർഷം ലാഭത്തിലായി. ആ ചാരിതാർത്ഥ്യത്തോടെയാണ് പടിയിറങ്ങുന്നത്. സി.പി.ഐ.എം സമ്മർദ്ദങ്ങൾക്ക് വഴങ്ങുന്ന പാർട്ടിയാണെന്ന് താൻ കരുതുന്നില്ലെന്നും കൂടുതൽ കാര്യങ്ങൾ പിന്നീട് വ്യക്തമാക്കാമെന്നും അദ്ദേഹം കൂട്ടിച്ചേർത്തു.
