കൊച്ചി: കൊച്ചിയിൽ നടന്ന കെപിസിസിയുടെ 'മഹാപഞ്ചായത്ത്' സംഗമത്തിനിടെ ലോക്സഭാ പ്രതിപക്ഷ നേതാവ് രാഹുൽ ഗാന്ധിയെ (Rahul Gandhi) കുഴപ്പിച്ച് കാണിയുടെ ചോദ്യം. കേരളത്തിലെപ്പോലെ പശ്ചിമ ബംഗാളിൽ വികസനം വരാത്തത് എന്തുകൊണ്ടാണെന്നായിരുന്നു ഹിന്ദിയിലുള്ള ചോദ്യം. ഈ അപ്രതീക്ഷിത ചോദ്യത്തിന് മറുപടി നൽകാതെ രാഹുൽ ഗാന്ധിയും മറ്റ് മുതിർന്ന കോൺഗ്രസ് നേതാക്കളും ഒഴിഞ്ഞുമാറിയത് വലിയ രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്. സംഭവത്തിന്റെ വീഡിയോ ദൃശ്യങ്ങൾ ഇപ്പോൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്.
രാഹുൽ ഗാന്ധി അഞ്ചു മിനിറ്റ് നേരം കാണികളുമായി സംവദിക്കുമെന്ന് കെ.സി. വേണുഗോപാൽ അറിയിച്ചതിന് പിന്നാലെയാണ് സദസ്സിലുണ്ടായിരുന്ന ഒരാൾ ഈ ചോദ്യം ഉന്നയിച്ചത്. ചോദ്യം കേട്ട നേതാക്കൾ അല്പനേരം നിശബ്ദരായെങ്കിലും, ഉടൻ തന്നെ ഇടപെട്ട ഷാഫി പറമ്പിൽ എംപി മൈക്കിലൂടെ തിരുത്തൽ നൽകി. തൊഴിലുറപ്പുമായി ബന്ധപ്പെട്ട ചോദ്യങ്ങൾ മാത്രം ചോദിച്ചാൽ മതിയെന്നായിരുന്നു ഷാഫിയുടെ നിർദ്ദേശം. ഇതോടെ ബംഗാൾ വികസനത്തെക്കുറിച്ചുള്ള ചോദ്യത്തിന് മറുപടി നൽകാതെ വേദിയിലുണ്ടായിരുന്നവർ അടുത്ത ചോദ്യങ്ങളിലേക്ക് കടക്കുകയായിരുന്നു.
തദ്ദേശ തിരഞ്ഞെടുപ്പിൽ യുഡിഎഫിനുണ്ടായ വൻ വിജയം വരാനിരിക്കുന്ന നിയമസഭാ തിരഞ്ഞെടുപ്പിലും ആവർത്തിക്കുമെന്ന് പരിപാടിയിൽ സംസാരിക്കവേ രാഹുൽ ഗാന്ധി പ്രത്യാശ പ്രകടിപ്പിച്ചു. കേരളത്തിലെ വികസന മാതൃകകൾ കോൺഗ്രസ് മുന്നോട്ട് കൊണ്ടുപോകുമെന്നും അദ്ദേഹം പറഞ്ഞു. എന്നാൽ സ്വന്തം പാർട്ടിക്ക് നിർണ്ണായക സ്വാധീനമുണ്ടായിരുന്ന ബംഗാൾ പോലുള്ള സംസ്ഥാനങ്ങളിൽ എന്തുകൊണ്ട് വികസനം സാധ്യമായില്ല എന്ന ചോദ്യം കോൺഗ്രസിനെ പ്രതിരോധത്തിലാക്കിയിരിക്കുകയാണ്. എൽഡിഎഫ് - യുഡിഎഫ് മുന്നണികൾ മാറിമാറി ഭരിച്ച കേരളത്തിലെ നേട്ടങ്ങൾ പരാമർശിച്ചതുകൊണ്ടുതന്നെ ഈ ചോദ്യം ഏറെ പ്രസക്തമായി വിലയിരുത്തപ്പെടുന്നു.
During the KPCC 'Mahapanchayat' in Kochi, Rahul Gandhi faced an unexpected question from an attendee about why West Bengal lacks development compared to Kerala. While the query was asked in Hindi, Rahul Gandhi and other senior Congress leaders remained silent. Shafi Parambil MP quickly intervened, requesting the audience to stick to questions related only to the MGNREGA scheme. The video of this awkward moment has since gone viral, sparking debates over Congress’s developmental track record in different states.