പത്തനംതിട്ട: പന്തളത്ത് റോഡിൽ വെച്ച് സമയക്രമത്തെച്ചൊല്ലിയുള്ള തർക്കത്തിനിടെ യാത്രാബസുകൾ മനഃപൂർവ്വം കൊണ്ടിടിപ്പിച്ച സംഭവത്തിൽ കടുത്ത നടപടി മുന്നറിയിപ്പുമായി മോട്ടോർ വാഹന വകുപ്പ് (Pandalam private bus fight). ‘ദുർഗ’ എന്ന സ്വകാര്യ ബസ് തൊട്ടുമുന്നിലുണ്ടായിരുന്ന ‘രാഖി’ എന്ന ബസിന് പിന്നിലേക്ക് മനഃപൂർവ്വം ഇടിച്ച് കയറ്റുന്ന ഞെട്ടിക്കുന്ന ദൃശ്യങ്ങൾ ഔദ്യോഗിക സാമൂഹിക മാധ്യമ അക്കൗണ്ടുകളിലൂടെ പങ്കുവെച്ചാണ് എംവിഡി മുന്നറിയിപ്പ് നൽകിയത്.
“രണ്ടറ്റം കൂട്ടിമുട്ടിക്കണ്ടേ, പക്ഷെ ശുദ്ധ തെമ്മാടിത്തരം വെച്ചുപൊറുപ്പിക്കില്ല. പണി വരുന്നുണ്ട് അവറാച്ചാ…” എന്ന പ്രശസ്തമായ സിനിമാ ഡയലോഗ് ഉൾപ്പെടുത്തിയുള്ള കടുത്ത കുറിപ്പോടെയാണ് 45 സെക്കൻഡ് ദൈർഘ്യമുള്ള വീഡിയോ മോട്ടോർ വാഹന വകുപ്പ് പങ്കുവെച്ചിരിക്കുന്നത്. നിരപരാധികളായ യാത്രക്കാരുടെയും മറ്റ് റോഡ് ഉപയോക്താക്കളുടെയും ജീവന് കടുത്ത ഭീഷണിയാകുന്ന ഇത്തരം ഗുണ്ടായിസങ്ങൾ നിരത്തുകളിൽ ഒരു കാരണവശാലും അനുവദിക്കില്ലെന്ന് അധികൃതർ വ്യക്തമാക്കി.
റോഡിൽ വെച്ച് രാഖി എന്ന ബസിന്റെ പിൻഭാഗത്ത് ദുർഗ ബസ് മനഃപൂർവ്വം മുട്ടിക്കുന്നതും, അതിന് ശേഷം വണ്ടി അല്പം മുന്നോട്ട് എടുത്ത ശേഷം പെട്ടെന്ന് റിവേഴ്സ് ഗിയറിലിട്ട് അതിശക്തമായി വന്നിടിക്കുന്നതും വീഡിയോയിൽ വളരെ വ്യക്തമാണ്. സംഭവത്തിൽ ഉൾപ്പെട്ട ഡ്രൈവർമാരുടെ ഡ്രൈവിംഗ് ലൈസൻസ് അടിയന്തരമായി റദ്ദാക്കുന്നതിനും, ബസുകളുടെ റൂട്ട് പെർമിറ്റ് സസ്പെൻഡ് ചെയ്യുന്നതുൾപ്പെടെയുള്ള കടുത്ത നിയമനടപടികളിലേക്ക് മോട്ടോർ വാഹന വകുപ്പ് കടക്കുകയാണെന്ന് അധികൃതർ അറിയിച്ചു
.
വെള്ളിയാഴ്ച വൈകുന്നേരം നാല് മണിയോടെ പന്തളം മെഡിക്കൽ മിഷൻ ജംഗ്ഷന് സമീപമായിരുന്നു സിനിമകളെ വെല്ലുന്ന രീതിയിലുള്ള ഈ അപകടം അരങ്ങേറിയത്. സമയക്രമം തെറ്റിച്ച് ഓടിച്ചതിന്റെ പേരിൽ ദുർഗ ബസിനെതിരെ രാഖി ബസിന്റെ ഉടമ നേരത്തെ നൂറനാട് പോലീസിൽ പരാതി നൽകിയിരുന്നു. ഇതിലുണ്ടായ വ്യക്തിവൈരാഗ്യമാണ് പരസ്യമായ ആക്രമണത്തിലേക്ക് നയിച്ചതെന്നാണ് ലഭിക്കുന്ന വിവരം. സംഭവത്തിൽ ദുർഗ ബസിലെ ജീവനക്കാർക്കെതിരെ പോലീസ് ജാമ്യമില്ലാ വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ട്.
Story Summary: The Motor Vehicles Department (MVD) has issued a strict warning after a private bus named ‘Durga’ intentionally rammed into another bus named ‘Rakhi’ following a dispute over bus timings in Pandalam. Sharing the shocking CCTV footage on social media with a movie dialogue alert, the MVD stated that the drivers’ licenses and permits will be cancelled.
