കോട്ടയം: സംസ്ഥാനത്തെ പ്രമുഖ സമുദായ സംഘടനകളായ എൻ.എസ്.എസും എസ്.എൻ.ഡി.പിയും തമ്മിലുള്ള ഐക്യനീക്കം പാളിയിരുന്നു. സംവരണ വിഷയത്തിലുള്ള നിലപാടുകളിലെ വൈരുദ്ധ്യവും രാഷ്ട്രീയ ലക്ഷ്യങ്ങളുമാണ് പിന്മാറ്റത്തിന് പിന്നിലെ പ്രധാന കാരണമെന്നാണ് സൂചന.(NSS-SNDP unity fails over reservation)
ഐക്യം യാഥാർത്ഥ്യമായാൽ അത് എൻ.എസ്.എസിന്റെ സംവരണത്തിന് തിരിച്ചടിയാകുമെന്ന് ഡയറക്ടർ ബോർഡ് വിലയിരുത്തി. സംവരണ ആനുകൂല്യങ്ങളിൽ എസ്.എൻ.ഡി.പിക്ക് മാത്രമായിരിക്കും ഐക്യം ഗുണകരമാവുക എന്ന ആശങ്കയാണ് അംഗങ്ങൾ പങ്കുവെച്ചത്.
എൻ.എസ്.എസ് ഡയറക്ടർ ബോർഡിലെ 28 അംഗങ്ങളിൽ 25 പേരും ഐക്യനീക്കത്തെ ശക്തമായി എതിർത്തു. എൻ.എസ്.എസിന്റെ അടിസ്ഥാന മൂല്യങ്ങളിൽ മാറ്റം വരുത്തിക്കൊണ്ടുള്ള ഒരു ഐക്യവും പ്രായോഗികമല്ലെന്നാണ് ഭൂരിപക്ഷാഭിപ്രായം.
ഈ ഐക്യനീക്കത്തിന് പിന്നിൽ ചില രാഷ്ട്രീയ ലക്ഷ്യങ്ങളുണ്ടെന്ന് സംശയിക്കുന്നതായി എൻ.എസ്.എസ് ജനറൽ സെക്രട്ടറി ജി. സുകുമാരൻ നായർ വ്യക്തമാക്കി. ഈ തിരിച്ചറിവാണ് പെട്ടെന്നുള്ള പിന്മാറ്റത്തിന് കാരണമായതെന്നും അദ്ദേഹം കൂട്ടിച്ചേർത്തു.
