തിരുവനന്തപുരം: കേരളത്തിലെ ‘തുടർഭരണ’ത്തെക്കുറിച്ചുള്ള തന്റെ പരാമർശങ്ങൾ രാഷ്ട്രീയ വിവാദങ്ങൾക്ക് വഴിവെച്ചതോടെ, വിഷയത്തിൽ കൂടുതൽ പ്രതികരണത്തിനില്ലെന്ന് വ്യക്തമാക്കി കെ സച്ചിദാനന്ദൻ. ഫെയ്സ്ബുക്ക് പോസ്റ്റിലൂടെയാണ് അദ്ദേഹം തന്റെ നിലപാട് വ്യക്തമാക്കിയത്.(No further response on this issue, says K Satchidanandan on the LDF rule controversy )
തന്റെ വാക്കുകളെ ദുർവ്യാഖ്യാനം ചെയ്യുന്നവർക്കെതിരെ രൂക്ഷമായ ഭാഷയിലാണ് അദ്ദേഹം പ്രതികരിച്ചത്. ഒരു പൊതുതത്വത്തെപ്പോലും ഇവിടത്തെ ‘പാർട്ടി യുദ്ധങ്ങളിലേക്ക്’ ചുരുക്കി ദുർവ്യാഖ്യാനം ചെയ്യുന്നത് അല്പബുദ്ധികളാണെന്ന് അദ്ദേഹം കുറിച്ചു.
ജല്പനങ്ങൾക്ക് മറുപടി നൽകി സമയം കളയാനില്ലെന്നും, തന്റെ വാക്കുകൾ വഴി കുറച്ചുപേർക്ക് ‘ഉപജീവനം’ ലഭിച്ചതിൽ സന്തോഷമുണ്ടെന്നും അദ്ദേഹം പരിഹാസരൂപേണ പറഞ്ഞു. ഇനി ഈ വിഷയത്തിൽ പ്രതികരണമില്ലെന്നും അദ്ദേഹം കൂട്ടിച്ചേർത്തു.
