കോട്ടയം: കേരള കോൺഗ്രസ് (എം) നേരിട്ട അപ്രതീക്ഷിത പരാജയത്തിന് പിന്നാലെ പാർട്ടി പ്രവർത്തകർക്കും അണികൾക്കും ആത്മവിശ്വാസം പകരുന്ന കുറിപ്പുമായി നിഷ ജോസ് കെ. മാണി (Nisha Jose K Mani Facebook Post). പ്രയത്നിച്ചതോ പ്രാർത്ഥിച്ചതോ ആയ ഫലമല്ല ഉണ്ടായതെങ്കിലും, കൂടുതൽ ശക്തിയോടെ തിരിച്ചുവരുമെന്ന് അവർ വ്യക്തമാക്കി.
വെറുമൊരു ഭാര്യ എന്ന നിലയിലല്ല, ജോസ് കെ. മാണിയിലുള്ള വിശ്വാസത്തിന്റെ പേരിലാണ് താൻ ഒപ്പം നിൽക്കുന്നതെന്ന് നിഷ കുറിച്ചു. അദ്ദേഹത്തിൽ താൻ കണ്ടത് വലിയ ധൈര്യമാണെന്നും ഇതൊരു തോൽവിയല്ലെന്നും അവർ പറഞ്ഞു. കെ.എം. മാണിയുടെയും കുട്ടിയമ്മയുടെയും സേവന പാരമ്പര്യവും ജനങ്ങളുമായുള്ള ബന്ധവും അതേപടി മുന്നോട്ട് കൊണ്ടുപോകുമെന്നും അവർ കൂട്ടിച്ചേർത്തു.
“ഇത് അവസാനമല്ല, ഒരു പുതിയ തുടക്കം മാത്രമാണ്” എന്ന് വ്യക്തമാക്കിയ നിഷ, തങ്ങളെ സ്വീകരിച്ച ജനങ്ങളോടും പ്രാർത്ഥിച്ചവരോടും നന്ദി രേഖപ്പെടുത്തി.
തിരഞ്ഞെടുപ്പിൽ പാലാ ഉൾപ്പെടെയുള്ള മണ്ഡലങ്ങളിൽ പാർട്ടിക്ക് വലിയ തിരിച്ചടിയാണ് നേരിട്ടത്. ഇടതുമുന്നണിക്കൊപ്പം ചേർന്ന് മത്സരിച്ച കേരള കോൺഗ്രസ് (എം)-ന്റെ എല്ലാ സ്ഥാനാർത്ഥികളും ഇത്തവണ പരാജയപ്പെട്ടിരുന്നു. ഈ സാഹചര്യത്തിൽ പാർട്ടിക്കുള്ളിലെ നിരാശ മാറ്റാനാണ് നിഷയുടെ കുറിപ്പ് ലക്ഷ്യമിടുന്നത്.
Story Summary: Nisha Jose K. Mani shared an emotional Facebook post supporting her husband Jose K. Mani after Kerala Congress (M) lost all 12 seats it contested in the 2026 Assembly elections. She emphasized that this is not the end but a new beginning and expressed confidence in a strong comeback.
