കൊച്ചി: നഗരത്തിലെ സ്വകാര്യ ബസുകൾ മിന്നൽ പണിമുടക്ക് നടത്തിയ സാഹചര്യത്തിൽ, കടുത്ത നിലപാടുമായി ഗതാഗത മന്ത്രി കെ.ബി. ഗണേഷ് കുമാർ രംഗത്തെത്തി. എത്ര വേണമെങ്കിലും പണിമുടക്ക് നടത്തിക്കോളൂ എന്നും, സ്വകാര്യ ബസ് സർവീസില്ലാത്ത റൂട്ടുകളിൽ കെ.എസ്.ആർ.ടി.സി. ബസുകൾ സർവീസ് നടത്തുമെന്നും മന്ത്രി വ്യക്തമാക്കി.(Minister of Transport on private bus strike in Kochi )
പണിമുടക്ക് നേരിടാനായി ആവശ്യത്തിനുള്ള കെ.എസ്.ആർ.ടി.സി. ബസുകൾ ഇന്നലെ രാത്രി തന്നെ കൊച്ചിയിൽ എത്തിച്ചിട്ടുണ്ടെന്ന് മന്ത്രി അറിയിച്ചു. "സ്വകാര്യ ബസുകൾ പണിമുടക്ക് എത്ര കാലം തുടരുമെന്ന് നോക്കട്ടെ" എന്ന് പറഞ്ഞ മന്ത്രി, പണിമുടക്കുന്ന ബസുകളുടെ ഫോട്ടോ എടുത്തിട്ടുണ്ടെന്നും വ്യക്തമാക്കി.
ബസ് സർവീസ് ഒരു അവശ്യ സർവീസാണെന്ന് ഓർമ്മിപ്പിച്ച മന്ത്രി, യാത്രക്കാരെ ബുദ്ധിമുട്ടിക്കാൻ ആരെയും അനുവദിക്കില്ലെന്ന് കൂട്ടിച്ചേർത്തു. "യാത്രക്കാരുടെ ബുദ്ധിമുട്ടുകൾ പരിഹരിക്കാനുള്ള നടപടികൾ സ്വീകരിക്കും," ഗതാഗത മന്ത്രി ഉറപ്പുനൽകി.
മിന്നൽ പണിമുടക്കിനെതിരെ കർശന നിലപാടെടുക്കാൻ സർക്കാർ തീരുമാനിച്ചതോടെ, കൊച്ചിയിലെ ബസ് റൂട്ടുകളിൽ കെ.എസ്.ആർ.ടി.സി. കൂടുതൽ സർവീസുകൾ ഉടൻ ആരംഭിക്കും.