കൊച്ചി: ജനനം മുതൽ നിശബ്ദതയുടെ ലോകത്തായിരുന്ന ഇടുക്കി ചെമ്മണ്ണാർ സ്വദേശി ആഞ്ചലോയ്ക്ക് ഇനി ശബ്ദങ്ങളുടെ പുത്തൻ ലോകം (Kathodu Kathoram Project). മമ്മൂട്ടിയുടെ ‘കാതോട് കാതോരം’ പദ്ധതിയിലൂടെ കേൾവിശക്തി വീണ്ടെടുത്ത ആഞ്ചലോ ആദ്യം കേട്ട മനുഷ്യശബ്ദം മലയാളത്തിന്റെ പ്രിയതാരം മമ്മൂട്ടിയുടേതായിരുന്നു. “മോനെ ആഞ്ചലോ, ഞാൻ മമ്മൂട്ടിയാണ്…” എന്ന് തുടങ്ങുന്ന വാത്സല്യം നിറഞ്ഞ വാക്കുകളിലൂടെ താരം ആഞ്ചലോയെ ശബ്ദലോകത്തേക്ക് സ്വാഗതം ചെയ്തു.
പ്രതീക്ഷയായ ‘കാതോട് കാതോരം’
സാധാരണ കർഷകനായ ജെയ്സൺ-ആൻഷ ദമ്പതികൾക്ക് മകന്റെ ചികിത്സയ്ക്കായി വേണ്ടിവരുന്ന 12 ലക്ഷത്തോളം രൂപ കണ്ടെത്തുക അസാധ്യമായിരുന്നു. ഈ ഘട്ടത്തിലാണ് മമ്മൂട്ടിയും രാജഗിരി ആശുപത്രിയും സംയുക്തമായി നടപ്പിലാക്കുന്ന സൗജന്യ കോക്ലിയർ ഇംപ്ലാന്റേഷൻ പദ്ധതി ആഞ്ചലോയ്ക്ക് തുണയായത്. സാമ്പത്തികമായി പിന്നാക്കം നിൽക്കുന്ന കുടുംബങ്ങളിലെ കുട്ടികൾക്ക് കേൾവിശക്തിയും സംസാരശേഷിയും നൽകുക എന്ന ലക്ഷ്യത്തോടെയാണ് ഈ പദ്ധതി വിഭാവനം ചെയ്തിരിക്കുന്നത്.
ചികിത്സയും ശസ്ത്രക്രിയയും
രാജഗിരി ആശുപത്രിയിലെ ഇ.എൻ.ടി വിഭാഗം മേധാവി ഡോ. രാജേഷ് രാജു ജോർജിന്റെ നേതൃത്വത്തിലുള്ള വിദഗ്ധ സംഘമാണ് ശസ്ത്രക്രിയ വിജയകരമായി പൂർത്തിയാക്കിയത്. ശസ്ത്രക്രിയയ്ക്ക് ശേഷം ഇംപ്ലാന്റ് സ്വിച്ച് ഓൺ ചെയ്ത നിമിഷമാണ് ആഞ്ചലോ ആദ്യമായി ശബ്ദങ്ങൾ കേട്ടുതുടങ്ങിയത്. ഉപകരണത്തിന്റെ ചിലവിനൊപ്പം തുടർന്ന് നൽകേണ്ട ഓഡിറ്ററി വെർബൽ തെറാപ്പി പരിശീലനവും ഈ പദ്ധതിയിലൂടെ സൗജന്യമായി നൽകുമെന്ന് ആശുപത്രി അധികൃതർ അറിയിച്ചു.
ഇനി സംസാരശേഷിക്കായുള്ള യാത്ര: കേൾവിശക്തി ലഭിച്ചെങ്കിലും ആഞ്ചലോയ്ക്ക് ഇനി സംസാരശേഷി വീണ്ടെടുക്കാൻ മാസങ്ങൾ നീളുന്ന സ്പീച്ച് തെറാപ്പി ആവശ്യമാണ്. ഇതിനായുള്ള പരിശീലനങ്ങളും കാതോട് കാതോരം പദ്ധതിയുടെ ഭാഗമായി ലഭിക്കും. ഇടുക്കിയിലെ മലയോര ഗ്രാമത്തിൽ നിന്ന് കേൾവിയുടെയും സംസാരത്തിന്റെയും ലോകത്തേക്ക് ചുവടുവെക്കുന്ന ആഞ്ചലോയ്ക്കും കുടുംബത്തിനും ഇത് വലിയൊരു സ്വപ്നസാഫല്യമാണ്.
Story Summary: Angelo, a four-year-old from Idukki who was born deaf, gained his sense of hearing through the ‘Kathodu Kathoram’ project, a joint initiative by Mammootty’s Care and Share International Foundation and Rajagiri Hospital. After a successful cochlear implantation surgery worth ₹12 lakh, Mammootty himself surprised Angelo by calling and speaking to him, marking the first human voice the boy had ever heard. The project provides free surgery, equipment, and follow-up speech therapy for children from underprivileged backgrounds.
