ദില്ലി: കെപിസിസി അധ്യക്ഷ സ്ഥാനത്ത് തുടർന്നുകൊണ്ട് തന്നെ വരാനിരിക്കുന്ന നിയമസഭാ തെരഞ്ഞെടുപ്പിൽ സണ്ണി ജോസഫിന് മത്സരിക്കാൻ ഹൈക്കമാൻഡ് അനുമതി നൽകി (KPCC President Sunny Joseph). നിലവിലെ അധ്യക്ഷ സ്ഥാനത്ത് മാറ്റമുണ്ടാകില്ലെന്നും തെരഞ്ഞെടുപ്പ് കാലയളവിൽ വർക്കിംഗ് പ്രസിഡന്റുമാരിൽ ഒരാൾക്ക് താത്കാലിക ചുമതല നൽകാനുമാണ് എഐസിസി തീരുമാനം. ഈ സ്ഥാനത്തേക്ക് ഷാഫി പറമ്പിലിനാണ് കൂടുതൽ സാധ്യത കൽപ്പിക്കപ്പെടുന്നത്.
സണ്ണി ജോസഫ് മികച്ച രീതിയിലാണ് സംഘടനയെ നയിക്കുന്നതെന്നും ഈ ഘട്ടത്തിൽ അധ്യക്ഷനെ മാറ്റേണ്ടതില്ലെന്നും എഐസിസി ജനറൽ സെക്രട്ടറി കെ.സി. വേണുഗോപാൽ വ്യക്തമാക്കി. ദില്ലിയിൽ സണ്ണി ജോസഫിനെ വിളിപ്പിച്ചു നടത്തിയ ചർച്ചയിലാണ് ഹൈക്കമാൻഡ് ഈ നിലപാട് വ്യക്തമാക്കിയത്. വർക്കിംഗ് പ്രസിഡന്റുമാരായ പി.സി. വിഷ്ണുനാഥും അനിൽ കുമാറും തെരഞ്ഞെടുപ്പിൽ മത്സരിക്കുകയാണെങ്കിൽ ഷാഫി പറമ്പിൽ എംപിക്കായിരിക്കും പാർട്ടിയുടെ താത്കാലിക ചുമതല ലഭിക്കുക. സ്ഥാനാർത്ഥി നിർണ്ണയം സംബന്ധിച്ച സ്ക്രീനിംഗ് കമ്മിറ്റി ചർച്ചകൾ ദില്ലിയിൽ പുരോഗമിക്കുകയാണ്.
Summary: The Congress High Command has permitted KPCC President Sunny Joseph to contest the upcoming assembly elections while retaining his leadership post.
