കൊച്ചി: മുഖ്യമന്ത്രി പിണറായി വിജയനുമായി ഫെയ്സ്ബുക്ക് വഴിയുള്ള സംവാദത്തിനല്ല, മറിച്ച് നേരിട്ടുള്ള സംവാദത്തിനാണ് താൻ തയ്യാറെന്ന് പ്രതിപക്ഷ നേതാവ് വി.ഡി. സതീശൻ. ചോദിക്കുന്ന ചോദ്യങ്ങൾക്ക് മറുപടിയില്ലാതെ മുഖ്യമന്ത്രി ഒളിച്ചോടുകയാണെന്നും സതീശൻ കുറ്റപ്പെടുത്തി.(Invited for a direct debate, not on Facebook, says VD Satheesan)
വികസനമുൾപ്പെടെയുള്ള ഏത് വിഷയത്തിലും ചർച്ചയ്ക്ക് പ്രതിപക്ഷം ഒരുക്കമാണെന്ന് അദ്ദേഹം വ്യക്തമാക്കി. വിഴിഞ്ഞം തുറമുഖം, ഗെയ്ൽ പൈപ്പ്ലൈൻ, കൊച്ചി മെട്രോ തുടങ്ങിയ പദ്ധതികളെക്കുറിച്ച് സംവദിക്കാം. ശബരിമല സ്വർണ്ണക്കൊള്ള, ‘ഡീൽ’ വിവാദം തുടങ്ങിയ വിഷയങ്ങളിലും മറുപടി പറയാൻ മുഖ്യമന്ത്രി തയ്യാറാകണം.
സിപിഎമ്മിന്റെ രാഷ്ട്രീയ ഇരട്ടത്താപ്പിനെതിരെ രൂക്ഷമായ ഭാഷയിലാണ് പ്രതിപക്ഷ നേതാവ് പ്രതികരിച്ചത്. നാല് വോട്ടിന് വേണ്ടി ആർ.എസ്.എസ്, ജമാഅത്തെ ഇസ്ലാമി, എസ്.ഡി.പി.ഐ, പി.ഡി.പി എന്നിവരുമായി കൂട്ടുകൂടാൻ മടിയില്ലാത്ത പാർട്ടിയാണ് സിപിഎം. ജനസംഘം വർഗ്ഗീയ പാർട്ടിയല്ലെന്ന് മുൻപ് വെള്ളപൂശിയ ചരിത്രം അവർക്കുണ്ട്. സിപിഎമ്മിനെ പിന്തുണച്ചാൽ മതേതരവാദികളും കോൺഗ്രസിനെ പിന്തുണച്ചാൽ വർഗ്ഗീയവാദികളും എന്ന മുഖ്യമന്ത്രിയുടെ നിലപാട് യുക്തിരഹിതമാണ്. എസ്.ഡി.പി.ഐ പിന്തുണയെക്കുറിച്ച് ഇപ്പോൾ സിപിഎം നേതാക്കൾ മിണ്ടാത്തത് എന്തുകൊണ്ടാണെന്നും അദ്ദേഹം ചോദിച്ചു.
മുതിർന്ന നേതാവ് ജി. സുധാകരനെതിരെ മുഖ്യമന്ത്രി നടത്തിയത് വിലകുറഞ്ഞ പ്രതികരണമാണെന്ന് സതീശൻ പറഞ്ഞു. കോൺഗ്രസോ ലീഗോ വിട്ടുവരുന്നവർക്ക് സിപിഎമ്മിൽ സ്ഥാനാർത്ഥിത്വം വരെ നൽകാം, എന്നാൽ സിപിഎം വിടുന്നവർക്ക് കോൺഗ്രസ് പിന്തുണ നൽകരുതെന്ന് പറയുന്നത് എന്ത് യുക്തിയാണെന്നും അദ്ദേഹം ചോദിച്ചു. മുഖ്യമന്ത്രിയുടെ പരസ്പരവിരുദ്ധമായ പ്രസ്താവനകൾ ജനങ്ങളെ പരിഹസിക്കുന്നതിന് തുല്യമാണെന്നും, വാദങ്ങൾ പൊളിച്ചടുക്കാൻ കഴിയുമെന്ന ആത്മവിശ്വാസമുള്ളതുകൊണ്ടാണ് മുഖ്യമന്ത്രിയെ സംവാദത്തിന് ക്ഷണിക്കുന്നതെന്നും വി.ഡി. സതീശൻ കൂട്ടിച്ചേർത്തു.
