തിരുവനന്തപുരം: സംസ്ഥാനത്ത് പകൽ താപനിലയിൽ അസാധാരണമായ വർധന രേഖപ്പെടുത്തുന്നതായി കാലാവസ്ഥാ വകുപ്പിന്റെ മുന്നറിയിപ്പ്. സാധാരണ താപനിലയേക്കാൾ 4 ഡിഗ്രി സെൽഷ്യസ് വരെ ചൂട് കൂടാൻ സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി നിർദ്ദേശിച്ചു.(Heatwave to hit Kerala, Public advised to be vigilant)
വരും ദിവസങ്ങളിൽ പകൽ സമയത്തെ ചൂട് 34°C മുതൽ 37°C വരെ ഉയരാൻ സാധ്യതയുണ്ട്. വരണ്ട അന്തരീക്ഷാവസ്ഥ തുടരുന്നതാണ് താപനില ഉയരാൻ കാരണം. രാവിലെ 11 മണി മുതൽ ഉച്ചയ്ക്ക് 3 മണി വരെ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കണം. ഈ സമയത്താണ് സൂര്യരശ്മികൾക്ക് ഏറ്റവും തീക്ഷ്ണത അനുഭവപ്പെടുക.
സൂര്യാഘാതം, സൂര്യാതപം, നിർജ്ജലീകരണം എന്നിവയ്ക്ക് സാധ്യതയുണ്ട്. ധാരാളം വെള്ളം കുടിക്കുക. എന്നാൽ മദ്യം, കാപ്പി, ചായ, കാർബണേറ്റഡ് സോഫ്റ്റ് ഡ്രിങ്കുകൾ തുടങ്ങിയ നിർജ്ജലീകരണത്തിന് കാരണമാകുന്ന പാനീയങ്ങൾ പകൽ സമയത്ത് പൂർണ്ണമായും ഒഴിവാക്കണം. അത്യാവശ്യ ഘട്ടങ്ങളിൽ പുറത്തിറങ്ങുന്നവർ കുട, തൊപ്പി എന്നിവ ഉപയോഗിക്കാനും കട്ടി കുറഞ്ഞ കോട്ടൺ വസ്ത്രങ്ങൾ ധരിക്കാനും ശ്രദ്ധിക്കണം.
നിർമ്മാണ തൊഴിലാളികൾ, കർഷകർ, വഴിയോര കച്ചവടക്കാർ എന്നിവർ ജോലി സമയം ക്രമീകരിക്കണമെന്നും അധികൃതർ അറിയിച്ചു. കടുത്ത ക്ഷീണമോ തളർച്ചയോ അനുഭവപ്പെട്ടാൽ ഉടൻ ചികിത്സ തേടേണ്ടതാണ്.
